РФ үөрэҕириитин министиэристибэтэ 2026 сылга оскуоланы түмүктүүр эксээмэннэри ыытыы расписаниетын оҥордо. БКЭ болдьохтоох кэмэ кулун тутар 20 күнүттэн муус устар 20 күнүгэр диэри, сүрүн — бэс ыйын 1 күнүттэн от ыйын 9 күнүгэр диэри, эбии — балаҕан ыйын 4 күнүттэн 25 күнүгэр диэри былааннанар. ССЭ-ны ыытыы эмиэ үс кэрдиискэ арахсар.
2026 сылга БКЭ расписаниета
Сүрүн кэми бэс ыйын 1 күнүгэр историяҕа, литератураҕа уонна химияҕа эксээмэннэр саҕалыахтара. Бэс ыйын 4 күнүгэр нуучча тылыгар, бэс ыйын 8 күнүгэр базовай уонна профильнай таһымнаах математикаҕа БКЭ ыытыллыаҕа. Бэс ыйын 11 күнүгэр БКЭ кыттыылаахтара обществознаниеҕа уонна физикаҕа, бэс ыйын 15 күнүгэр биологияҕа, географияҕа уонна омук тылларыгар БКЭ сүрүн чааһыгар эксээмэннэри туттарыахтарын сөп. Бэс ыйын 18 уонна 19 күннэригэр информатикаҕа уонна омук тылыгар эксээмэн тылынан чааһа ыытыллара былааннанар.
Бэс ыйын 22-25 күннэригэр барыларыгар эксээмэннэри туттарарга саппаас күннэр көрүллэллэр. От ыйын 8 уонна 9 күннэригэр быйылгы сыл выпускниктара бары баҕаларынан туттарбыт предметтэртэн биирдэстэрин хаттаан биэриэхтэрин сөп күннэрэ былааннаннылар.
2026 сылга ССЭ расписаниета
9-с кылааһы бүтэрээччилэргэ ССЭ ыытыы эмиэ үс кэмҥэ арахсар: болдьохтоох (муус устар 21 күнүттэн ыам ыйын 18 күнүгэр диэри), сүрүн (бэс ыйын 2 күнүттэн от ыйын 6 күнүгэр диэри) уонна эбии (балаҕан ыйын 3-тэн 25 күнүгэр диэри).
ССЭ сүрүн кэмэ бэс ыйын 2 күнүгэр математикаҕа эксээмэнтэн саҕаланыаҕа. Бэс ыйын 6 күнүгэр информатикаҕа уонна омук тылыгар, бэс ыйын 9 күнүгэр нуучча тылыгар эксээмэннэр ыытыллыахтара. Бэс ыйын 5, 16 уонна 19 күннэригэр нуучча тылын уонна математика киллэрбэккэ туран, бары атын предметтэргэ эксээмэннэр ыытыллыахтара.
ССЭ ыытыллар саппаас күннэрин расписаниета бу болдьоххо выпускниктарбыт ханнык баҕарар икки предмети толорон биэрэр кыахтаахтарын учуоттаан оҥоһулунна. Бэс ыйын 29 күнүгэр математикаҕа, от ыйын 2 күнүгэр нуучча тылыгар, от ыйын 3 уонна 6 күннэригэр нуучча тылын уонна математиканы киллэрбэккэ туран, бары үөрэх предметтэригэр эксээмэннэри туттарарга саппаас күн көрүллэр.
