Россияҕа Дьиэ кэргэн, Саха сиригэр Оҕо саас сыллара биллэриллэн үүммүт сыл Хаҥалас улууһугар Дьиэ кэргэн уонна оҕо саас сылын чэрчитинэн ааһарын туһунан дьаһалы улуус баһылыга Олег Иринеев ахсынньы 28 күнүгэр баттаабытын туһунан оройуон дьаһалтатын пресс-киинэ иһитиннэрэн турар. Онон, дьиэ кэргэн үгэһин, сыаннастарын харыстыыр уонна чөл хаалларар үлэ, оҕолоох ыалларга көмө салҕаныа. Нэһилиэнньэ, чуолаан, оҕо аймах доруобуйатын бөҕөргөтүүгэ улахан болҕомто ууруллуо. 50-н уонна онтон элбэх сыл бииргэ олорбут дьиэ кэргэннэри чиэстээһин салҕаныа.
Дьиэ кэргэн уонна оҕо саас сылын көрсө Саха сирин уон тыһыынчатааҕы олохтооҕо Нөмүгүттэн Татьяна уонна Николай Жирковтар дьиэ кэргэннэригэр үһүс оҕонон сэтинньи 7 күнүгэр төрөөбүтэ. Ахсынньы бүтүүтэ улуус, нэһилиэк салалтата, социальнай көмүскэл управлениета дьиэ кэргэни көрсөн эҕэрдэлээбиттэрэ, бэлэх, «Үйэ оҕо-то» сертификат туттарбыттара.
Оттон үүммүт сыл иккис күнүгэр Покровскайдааҕы роддомҥа биир бастакынан Покровскай олохтооҕо Анастасия Колесова үһүс оҕотун оҕолонно –кыыс оҕо күн сирин көрдө. Тохсунньу 3 күнүгэр Надежда Козлова эмиэ кыыс оҕолонно, тохсунньу 5-гэр – Өктөмтөн Надежда Неустроева эмиэ кыыстанна. Кырачааннар дьиэ кэргэттэригэр чэгиэн доруобуйаны, дьолу баҕарабыт!
Ольга Гермогенова, «Хаҥалас» хаһыат
