2023 сылга Мэҥэ Хаҥалас улууһун Бэдьимэ сэлиэнньэтигэр оскуола-сад тутуута саҕаланар. Ол туһунан өрөспүүбүлүкэ үөрэҕин уонна наукатын миниистирин солбуйааччы Марьяна Маркова бырабыыталыстыба отчуотун кэмигэр иһитиннэрдэ. Үөрэхтээһин объегын тутуу туһунан боппуруоһу олохтоох нэһилиэнньэ 10 сылы быһа туруоруста, диэн СИА кэпсиир.
«Бүгүҥҥү күҥҥэ олохтоох дьаһалта бырайыагы былаанныыр докумуон үлэтин түмүктүү сылдьар. Саҥа 90/40 кыамталаах тэрилтэ тутуута 2023 сылга саҕаланара былааннанар», — диэн иһитиннэрдэ Марьяна Маркова.
Нэһилиэк баһылыга Петр Андросов этэринэн, күүтүүлээх оскуола тутуутун боппуруоһун онус сылын туруорсар.
