Бүгүн Дьокуускай куоракка РФ Судаарыстыбаннай Мунньаҕын айылҕа ресурсаларыгар, бас билиигэ уонна сир сыһыаннаһыыларыгар кэмитиэт бэрэссэдээтэлэ Николай Николаев кыттыылаах сүбэ мунньах буолан ааста. Ойуурга сылдьан сир аһын хомуйуу, бултааһын, маһы кэрдэн туһаҕа таһаарыы, айылҕа баайын туһаныы – бу барыта сокуон кыраҕы хараҕынан көрүллэр.
edersaas.ru
«Ол боппуруостарын дьүүллэһэргэ аҕыйах ахсааннаах олохтоох дьон интэриэһэ эмиэ көрүллүөхтээх. Федеральнай бүддьүөттэн кэлэр субвенцияны тыырарга Сахабыт сирэ Арассыыйаҕа биир саамай улахан иэннээх сирдээх, киин сиртэн тэйиччи сытар мөлтөх суоллаах-иистээх, аҕыйах нэһилиэнньэлээх буоларын учуоттуохха наада. 34 улуустан күн бүгүн 8 эрэ улууска илиминэн балыктааһын көҥүллэнэн, атыттар бырааптарын күөмчүлүүр курдук. Дойдубутугар балыктаах улахан эбэлэр баар буоланнар, бу биир тыын боппуруос», — диэн СӨ Бырабыыталыстыбатын бэрэссэдээтэлин солбуйааччытын э.т. Денис Белозеров иһитиннэрдэ.
Ил Түмэн бэрэссэдээтэлэ Александр Жирков: «Эһиил Сахабыт сиригэр Ойуур форума ыытыллыаҕа. Быйыл оннук форум Хабаровскайга буолан ааста. Арассыыйаҕа баар ойуур 20% Сахабыт сирэ ылар, ол баайын туһанарга экологическай уонна экономическай интэриэһин тэҥҥэ көрүөххэ наада. Биһиги бүгүҥҥү ыалдьыппыт Николай Николаев салайар кэмитиэтэ ол боппуруостарынан быһаччы дьарыктанар», — диэн бэлиэтээн эттэ.
«РФ Судаарыстыбаннай Мунньаҕа улахан бырайыагы саҕалаан, ойуур национальнай форумнарын эрэгийиэннэринэн ыытан эрэбит. Сири уонна айылҕа баайын туһаныыга баар кыһалҕалары быһаарарга эһигиттэн харданы эрэйэбит. Маны таһынан, сир баайын туһаныы туһунан сокуоҥҥа кэккэ уларытыылары киллэрии уолдьаста диэн дойду Бырабыыталыстыбата этэр. Ону ылынарга Саха сирин уратытын эмиэ көрүөхпүтүн наада», — диэн профильнай кэмитиэт бэрэссэдээтэлэ, Госдума дьокутаата Николай Николаев инники былааннарын билиһиннэрдэ.
Онон, айылҕа, сир баайын туһаныыга эһиил ойуур национальнай форума ыытыллан, федеральнай сокуоҥҥа кэккэ уларыйыылар киирэллэрэ күүтүллэр.
Марианна ТЫРТЫКОВА, «Саха сирэ» хаһыат, edersaas.ru
