Чычымах нэһилиэгиттэн «Талба» хамаанда сылын аайы ыытыллар «Уопсай хомуур» бүтүн Россиятааҕы куонкуруска «Муҥутуур чемпион» номинацияҕа кыайыылааҕынан таҕыста, кини 8 тыһыынчаттан тахса кыттааччыны түмэн, Россия уулаах сирдэрин кытылын ыраас оҥорорго сыаллаах-соруктаах үлэлээтэ.
Куонкурус тэрийээччилэрэ иһитиннэрэллэринэн, саха дьоно өрүс кытылынан 1,4 килэмиэтиртэн тахса сири ыраастаан, 144 кубометр бөҕү хомуйбуттар. Волонтердар сыраларынан Амма өрүс кытыла ырааһырда, көҕүлээһиннэрэ — биллэр буолла.
«Уопсай хомуур» куонкурус усулуобуйатыгар олоҕуран, кыайыылаах регионугар 2026 сылга уу кытылын ыраастыыр «Россия Уута» экобэстибээл тэриллиэҕэ.
Быйыл Красноярскай кыраай (2059 кыттааччы), Ямало-Ненецкэй автономнай уокурук (565 кыттааччы), Амур уобалаһын (468 кыттааччы), Новосибирскай уобалас (400 кыттааччы) уонна Хабаровскай кыраай (390 кыттааччы) олохтоохторо ордук көхтөөх буоллулар.
«Уопсай хомуур» куонкурус «Россия Уута» бүтүн Россиятааҕы аахсыйа чэрчитинэн ыытыллар. 2014 сылтан тэрээһин дойду бары регионнарыгар 12 мөлүйүөнтэн тахса кыттааччыны холбоото. Аахсыйаны тэрийээччи — Россия Айылҕа Харыстабылын Министиэристибэтэ, сүрүннээччи — «Россия Айылҕа Харыстабылын Аналитическай киинэ» ФГБУ.
«Россия Уута» аахсыйа — «Экологическай чэгиэн буолуу» национальнай бырайыак «Россия Уута» федеральнайдааҕы бырайыагын сорҕото. Аахсыйа бүтүн Россиятааҕы хабыыта — олохтоох түмсүүлэр холбоһуктаах күүстэрэ дойдуга уу ресурсаларыгар кыһаллыыларын, көмөлөрүн холобура буолар.
