«Навахту.рф» бырайыак саҕаланыаҕыттан промышленность хайысхатыгар саҥа үлэнэн 1400-тэн тахса Саха сирин киһитэ хааччылынна. Бырайыак хамаандата балтараа сыл устата 14 тыһ тахса киһи баазатын оҥордо, суруйар регион сүрүн пресс-сулууспата.
«Бырайыак улахан социальнай-экономическай хайысхалаах уонна олохтоох нэһилиэнньэ дохуотун үрдэтиигэ ананар, регион промышленноһын сайдыытын чэрчитинэн. Хас биир солкуобай региоҥҥа 192 солк сылы быһа төнүннэрэр. Ый аайы 100 мөл солк Саха сирин ыалларыгар хамнас буолан тиийэр. Маннык бырайыак дойдуга суох», — диэтэ бырайыак салайааччыта Пётр Чехордун.
«Навахту.рф» кытта 36 промышленнай уонна инфраструктурнай тэрилтэ бииргэ үлэлиир. Кинилэр ортолоругар чоҕу хостуур «Колмар» хампаанньа, 2021 сылга Саха сириттэн 1600-тэн тахса киһини үлэнэн хааччыйда.
«»Колмар» хампаанньа курдук олохтоох кадрдары промышленноска бэлэмнээһиҥҥэ үлэлиир тэрилтэ эбиллэҕэ диэн эрэллээхпит», — диэтэ Саха сирин баһылыга Айсен Николаев.
Санаттахха, «Навахту.рф» бырайыак 2020 сыл сэтинньититтэн саҕаламмыта.
This post was published on 06.12.2022 16:01 16:01