Анал байыаннай дьайыы саҕаланыаҕыттан «Саха сирэ эйигин кытта» уопсастыбаннай хамсааһын волонтердара 137 туоннаттан тахса гуманитарнай көмөнү фроҥҥа ыыттылар. Бу туһунан Саха сирин ыччат дьыалатыгар уонна социальнай коммуникацияҕа миниистири солбуйааччы Александр Максимов иһитиннэрдэ.
«2022 сылтан АБДь байыастарыгар 5039 аадырыстаах баһыылка тириэрдиллибит. 2836 волонтер уопсай Россиятааҕы хардарыта көмөлөһүү акциятын #МЫВМЕСТЕ регионнааҕы штабын үлэтигэр быһаччы кыттыыны ылла. Доброволецтар бойобуой дьайыы кыттыылаахтарыгар уонна кинилэр дьиэ кэргэттэрин чилиэннэригэр 5801 сайаапканан көмө оҥордулар», – диэтэ кини.
Александр Максимов иһитиннэрбитинэн, «Добро.рф» платформаҕа Саха сириттэн 40 741 волонтер уонна 2998 үтүө дьыала бэлиэтэммит. 2025 сыллаахха бэлиэтэнээһини 7523 киһи уонна 1146 үтүө дьыала ааспыт.
«Өрөспүүбүлүкэ сиригэр-уотугар анал дьайыы байыастарыгар гуманитарнай көмөнү хомуйуунан, ылыынан, суортааһынынан, тэрийиитинэн уонна ыытыынан дьарыктанар уопсастыбаннай уонна волонтерскай тэрилтэлэр бигэ ситимнэрэ тэрилиннэ. #МЫВМЕСТЕ муниципальнай штабтара биһиги өрөспүүбүлүкэбит 36 муниципальнай оройуоннарыгар уонна куорат уокуруктарыгар үлэлииллэр», – диэн биэдэмистибэ баһылыгын солбуйааччы чуолкайдаата.
Александр Максимов өрөспүүбүлүкэҕэ «Якутия с тобой», «Боевые шелкопряды Якутии», «Добровольцы Якутии», «Внуки Победителей», «Илии сылааһа», «Волонтеры Саха» уонна «От сердца к сердцу» волонтердар тэрилтэлэрэ гуманитарнай көмөнү ылыы пууннара үлэлииллэрин бэлиэтээтэ.
“Бу баҕа өттүлэринэн түмсүүлэр бэрэстэбиитэллэрэ өрөспүүбүлүкэ бары муниципальнай тэриллиилэригэр эмиэ үлэлииллэр», – диэн бэлиэтээтэ Саха сирин ыччат дьыалатыгар уонна социальнай коммуникацияҕа миниистири солбуйааччы Александр Максимов.
