10 сыл иһигэр Илиҥҥи экономическай форумҥа Саха Сирэ 200-тэн тахса сөбүлэһии түһэристэ. Ити түмүгэр регион экономикатыгар инвестиция кээмэйэ 1 триллион солкуобайтан тахса буолла. 9 тыһыынчаттан тахса үлэ миэстэтэ тэрилиннэ, оттон олоххо киирбит инфраструктурнай бырайыактар 469 тыһыынча саха дьонун олоҕун хаачыстыбатын үрдэттилэр, диэн өрөспүүбүлүкэ экономикатын министерствотыттан иһитиннэрдилэр.
«Өрөспүүбүлүкэ олохтоохторо ВЭФ-ка илии баттаммыт сөбүлэһиилэр чэрчилэринэн олоххо киирбит үгүс бырайыактары билэллэр: сылы эргиччи «Саюри» теплица комплекса, дьоҕус наука академиятын саҥа үөрэтэр-лабораторнай корпуһа, «Сулустаах» микрооройуон, оптуобус пааркатын саҥардыы, Арктика оройуоннары ВОЛС-ка холбооһун, Тиксии бөһүөлэгин эрэллээхтик энергиянан хааччыйар тыал комплексын үлэҕэ киллэрии. Бары сөбүлэһиилэр, бастатан туран, Саха сирин дьонун олоҕун хаачыстыбатын тупсарыыга туһуланаллар», — диэн бэлиэтээтэ Саха сирин экономикатын миниистирэ Петр Попов.
Форумҥа 531 км уһуннаах Тиихэй Акыйаан тимир суолун, 2,7 тонна көмүс оҥорон таһаарар кыамталаах «Тарын» ГОК, сылга 10-ҥа диэри флот саҥардыллыытын хааччыйар Жатай судоверфь тутууларыгар сөбүлэһиилэргэ илии баттаннылар.
2023 сыллаахха Россия президенэ Владимир Путин Илин экономическай форум чэрчитинэн Уһук Илин куораттарын, ол иһигэр Дьокуускай уонна Нерюнгри куораттарын сайыннарыы бырагыраамаларын олоххо киллэриини көрдө.
Куорат агломерацияларын кэлим социальнай-экономическай сайдыытын уһун болдьохтоох былааннарын чэрчитинэн 2023-2025 сылларга 33 эбийиэги олоххо киллэрии саҕаланна: 22 — Дьокуускайга уонна 11 — Нерюнгрига. Дьокуускайга Ленин болуоссата, Роман Дмитриев аатынан Сайсары күөлүн биэрэгэ уонна дьиэ тутар кэмбинээт саҥардылынна, оттон Нерюнгрига оройуон киин балыыһатын икки блога саҥардылынна.
ВЭФ-ка түһэрсиллибит сөбүлэһиилэр көмөлөрүнэн Нерюнгри оройуонугар Сыллах чохтоох сирэ, Усуйаана оройуонугар «Тирэхтээх Үрүйэҕэ» хорҕолдьун сирдэрин уо.д.а. баһылыахтара.
Ону тэҥэ ВЭФ-ка илии баттаммыт сөбүлэһии түмүгэр 2023 сылга «Квартал Труда» креативнай кластер үлэҕэ киирбитэ. Билигин кини уопсай дохуотун 262 мөл.солк. тиийдэ, 203 резидент баар.
«Сыллата ВЭФ-ка өрөспүүбүлүкэ уонунан улахан суолталаах сөбүлэһиини түһэрсэр. Быйыл регионнар икки ардыларынааҕы бииргэ үлэлээһинтэн саҕалаан, бырамыысыланнас эбийиэктэрин тэрийиигэ диэри киэҥ эйгэни хабар 30-ча саҥа сөбүлэһиигэ илии баттыырга былаанныыбыт. Итини сэргэ уопут атастаһар, тас экономическай сибээстэри бөҕөргөтөр, саҥа партнердары булар уонна холбоһуктаах бырайыактары олоххо киллэрэр сыаллаах панельнай сессияларга уонна бизнес-кэпсэтиилэргэ кыттыы былааннанар», — диэн Петр Попов иһитиннэрдэ.
Илиҥҥи экономическай форум – Уһук Илин экономикатын сайыннарыыга уонна Азия-Тиихэй Акыйаан регионугар норуоттар икки ардыларынааҕы бииргэ үлэлээһини кэҥэтиигэ былаһаакка буолар. Форум балаҕан ыйын 3-6 күннэригэр Владивостокка ыытыллыаҕа. Кини сүрүн тиэмэтэ: “Уһук Илин — эйэ уонна чэчирии сайдыы туһугар бииргэ үлэлээһин”. Тэрийээччи — Росконгресс Фондата.
