Бу күннэргэ Аммаҕа Федот Потапов аатынан культура киинигэр “Ыллаа, Ыра санаа” диэн дьахталлар ансамбллара 10 сылын туоларын бэлиэтиир дьоро киэһэ буолан ааста.


Кэрэ-бэлиэ киэһэ ансамбль салайааччыта Матрена Гаврильевна Васильеваҕа “За вклад в развитие народного художественного творчества Республики Саха (Якутия)” диэн бэлиэ туттардылар. Матрена Гаврильевна мин үөрэнээччим, 1986 сыллаахха ол саҕана эдэркээн кыыс биһиэхэ педучилищеҕа үөрэнэ кэлбитин, субу баар курдук өйдүүбүн. Дьыл-күн ааһара түргэнин. Матрена Гаврильевна Дьокуускайдааҕы педучилище музыкальнай салаатын бүтэрэн баран, Иркутскайдааҕы Государственнай Педагогическай институту 1990 сылга ситиһиилээхтик түмүктээбитэ. Ол сылтан кини Абаҕа музыкальнай оскуолатыгар, бастаан преподавателинэн, онтон дириэктэринэн үлэлээбитэ.

2002-2016 с.с. Матрена Гаврильевна Аммаҕа А.А.Черемных аатынан «Детская школа искусств» 14 сыл тухары педагогунан, вокальнай хоровой салаа сэбиэдиссэйинэн үлэлээбитэ. Ити үлэлиир кэмигэр ырыа алыбар ылларбыт оҕо тэрилтэлэрин үлэһиттэрин, музыкальнай оскуола учууталларын түмэн, вокальнай ансамбль тэрийбитэ.

Уон сыл тухары “Ыра санаа” Амма олохтоохторун ый аайы кэриэтэ иэйиилээх ырыаларынан үөрдэ турар. Ону таһынан ансамбль үгүс күрэхтэргэ ситиһиилээхтик кыттан кэллэ. Ансамбль кыттыылааҕа Таисия Жиркова ахтар: ”Ансамблбыт репертуарын улахан аҥаара тапталлаах Аммабыт туһунан ырыалар буолаллар. Ханна да сырыттарбыт Аммабыт кэрэтин туойан, биир дойдулаахтарбыт ырыаларын тарҕатан пропагандалаан кэллибит.” Ол курдук “Ыра санаа” 2012 сыллаахха Омскай куоракка “Поет село родное” фестивальга лауреат буолбута. 2014 Москваҕа буолар ыһыаҕы кэрэ ырыаларынан киэргэппитэ.

“Ыра санаа” салайааччыта Матрена Гаврильевна 2016 сылтан үөрэммит, музыкаҕа уһуйбут, сөп суолун ыйан биэрбит педколледж музыкальнай салаатыгар таһаарыылаахтык үлэлии-хамсыы сылдьар. Кини туйаҕын хатарааччы, тапталлаах кыыһа Дарина эмиэ биһиги музыкальнай салаабытыгар үөрэнэр. Эмиэ хаһан эрэ ийэтин курдук миэхэ “дирижирование” предмекка дьарыктанар.

Матрена Гаврильевна “Ыра санаатын” кытта арахсыбат, түгэн көһүннэ да Амматын диэки айанныы турар. Талааннаах үөрэнэччибин Матрена Гаврильевнаны үрдүк наҕараада ылбытынан эҕэрдэлиэхпин баҕарарабын. Өссө үрдүк ситиһиилэр арыаллыы турдуннар диэн алгыспын тиэрдэбин.

1
0
comments powered by HyperComments