Саха сирин баһылыга Егор Борисов Владимир Путин баһылыктаах Арассыыйа официальнай делегациятын састаабыгар киирэн, Токиоҕа үлэлиир. Өрөспүүбүлүкэ баһылыга Япония парламенын бэрэстэбиитэллэр балааталарын дьокутаатын Хории Манабуну кытта көрүстэ.
Тойон Манабу уон сыллааҕыта тэриллибит Саха сиригэр көмөлөһөр Япония кэмитиэтин салайар.
Кэмитиэт Арассыыйа бөдөҥ регионугар инвестиция бырайыактарын олоххо киллэриигэ, Саха сирин инвестицияҕа кыаҕын билиһиннэрэр соруктаах үлэлиир. Манна «Хоккайдо Корпорэйшн», «Kawasaki Heavy Industries, «Komai Haltec Inc.» уонна «Mitsui&Co. Ltd» тэрилтэлэр бырайыактарын киллэриэххэ сөп.
Япония кэмитиэтин иилээһининэн-саҕалааһынынан бу дойду эдэр дьоно «Азия оҕолоро» спортивнай оонньууларга аан бастаан кыттыбыттара.
Хории Манабу Арассыыйа делегацията Японияҕа кэлиитэ экономикаҕа икки өрүттээх, хардарыта барыстаах сөбүлэһиилэри түһэрсиигэ тоҕоостооҕун бэлиэтээн эттэ.
Егор Борисов Арассыыйа саамай бөдөҥ региона Японияны кытта хардарыта үлэлииргэ улахан интэриэстээҕин, Сэбиэскэй сойуус кэмигэр Япония инвестициятынан дойдуга улахан бырайыактар олоххо киирбиттэрин ыйда.
Егор Борисов Харии Манабу дьыалабыай эргимтэни салайан аны сайын өрөспүүбүлүкэҕэ кэлэригэр ыҥырда. «Япония бизнесменнэрэ Саха сирин туһунан билбэттэрин кэриэтэ. Онон маннык сырыы булгчу наадалаах», — диэтэ Ил Дархан.
Манабу Япония экономикаҕа, промышленноска уонна атыыга-эргиэҥҥэ миниистирин Хиросигэ Сэконы кытта бу хайысхаҕа ыкса үлэлиэх буолан эрэннэрдэ.
