Якутоптторг хотугу эргимтэҕэ таһаҕаһы тиэйиигэ-таһыыга сонун сүүрээни киллэрэн үлэни ыытар

0
122

Быйыл хотугу улуустарга таһа­ҕаһы уунан тиэйиини “Якутопт­торг” АУо икки сонун хайысханан тэрийдэ.


Бу туһунан «Якутопторг» тэрилтэ генеральнай дириэктэрэ Павел Федоров маннык билиһиннэрдэ:

 — Бастакы туурга – Халыма улуустарын бөлөҕөр 2 643,2 т ас-үөл бородууктата тиэрдиллиэхтээх. Бу күннэргэ Халыма улуустарын бөлөҕүн филиалларыгар былааннаммыт 733,6 т бурдук тиэрдилиннэ.

«Колымская судоходная компания» хааччахтаммыт эппиэтинэстээх тэрилтэ Зырянкаҕа – 173,6 т, Черскэйгэ – 173,6 т бурдугу тиэртэ. От ыйын бүтэһик күннэригэр Орто Халыма улууһугар 386,4 т бурдугу илдьиэҕэ. Бүгүҥҥү күҥҥэ социальнай суолталаах аһы-үөлү тиэйиигэ “Якутоптторг” АУо бэйэтин филиалларыгар былааннаммыт таһаҕаһы тиэйиигэ сыллааҕы былаанын 64 %-н толордо.

Бурдугу атыылаһыы “Ново­сибирскай — Владивосток — Магадан — Сеймчан” порда саҥа схеманы олоххо киллэриитин кытта ыкса сибээстээх. Быһа холуйан ааҕыынан, бу сонун сүүрээн 14 мөл.солк. бүддьүөт үбүн кэмчилээтэ. Маны таһынан социальнай бородуукта табаарын тиэйиигэ рефрижератор-контейнеры атыылаһыы төһүү күүһүнэн буолла. Хоту сиргэ оҕуруот аһын уонна фруктаны сибиэһэйдии тиэрдии уустуктардаах. Рефрижератор-контейнердар көмөлөрүнэн уһук хоту улуустарга уу суолунан күүтүүлээх “күөх рейстэр” оҥоһуллан эрэллэр. Контейнер иһигэр сайын – сөрүүн, кыһын сылаас температура режимэ тутуллар. Рефрижератор-контейнеры массыынанан, поеһынан, уу аалынан тиэйэ сылдьыахха сөп. Кылаабынайа, салгын аалынан тиэрдэрдээҕэр табаар сыаната биллэ удамыр буолар. Бу күннэргэ оҕуруот аһын тиэммит контейнер Владивостоктан Магадааҥҥа тиийэн, Сеймчанынан Орто Халыма куоратыгар тохтоон, Черскэй бөһүөлэгин туһаайыытын тутуһуохтаах.

Иккис туурга Арктика кытылынан уонна хотугу улуустарга ыытыллыахтаах 851,7 т бородуукта Дьокуускайга уонна Аллараа Бэстээххэ турар контейнердарга тиэллэ турар. Былааннаммыт бородууктаны Аллайыаха, Булуҥ уонна Усуйаана улуустарыгар тиэрдэргэ бэлэм.

Онон “Якутоптторг” АУо быйылгыттан социальнай суолталаах бородууктаны тиэйиигэ-таһыыга үлэтин тэтимнээхтик уонна саҥа тосхолу толкуйдаан олоххо киллэрэр. Саҥа уларыйыыны хоту дойду олохтоохторо аны күһүн оҕуруот аһын удамыр сыанаҕа атыыластахтарына чуолкай билиэхтэрэ.

0
0
[the_ad_group id="742"]