Социальнай суолталаах бородууктаны «Якутоптторг» тэрилтэ Арктикаҕа аан бастакытын хотугу муора суолунан тириэртэ. 730 туонна ас, маны сэргэ тутуу матырыйаала Аллараа Халыма Черскайыгар СТК-1012 теплоходунан Астраханьтан тириэрдилиннэ.
Аһы-үөлү Краснодарскай кыраай, Астраханскай уобалас оҥорон таһаарааччыларыттан быһа атыылаһылынна уонна Булуҥ, Усуйаана, Аллараа, Орто, Үөһэ Халымалар олохтоохторун хааччыйыыга тиксэрилиннэ.
«Якутоптторг хотугу муора суолунан бу бастакы тириэрдиитэ. Оҥорон таһаарааччылары кытта быһа дуогабар суруйсан, Арктика олохтоохторугар чэпчэки сыаналаах аһы-үөлү тириэрдэр сыаллаахпыт. Тириэрдии схемата төһө да ыараханын иһин, социальнай суолталаах аһы-үөлү тириэрдии иэнэ сылын аайы улаатар. 2022 сылга 9800 туоннаны тириэрдэр былааннаахпытыттан, кыһыҥҥы суолунан 5500 туонна миэстэтигэр тиксибитэ, навигациянан — 3900 туонна, авиациянан сыл бүтүөр диэри — 375 туонна», – тэрилтэ салайааччыта Николай Алексеев эттэ.
Астраханьтан Тиксиигэ уонна Черскэйгэ ас-үөл аҕалылынна. Бурдук, саахар, курууппа, мохоруон, мас арыыта, кэнсиэрбэлэр, утахтар, дьаабылыка, эриэппэ лук, хортуоппуй.
Хаартыска: Алексей Курило
