Муус устар 11 күнүгэр «Идэ – олох» диэн өрөспүүбүлүкэ эдэр быраастарыгар ыытыллыбыт бастакы куонкурус түмүктэннэ. Куонкурус кыттыылаахтара үлэлэрин уопутугар тирэҕирэн оҥорбут бэйэлэрин бырайыактарын билиһиннэрдилэр.
Маннык куонкурус быраас идэтин көтөҕөргө, нэһилиэнньэ эмчиккэ убаастабылын үрдэтэргэ, доруобуйа харыстабылыгар каадыр тиийбэтин быһаарарга, эмтиир тэрилтэлэр икки ардыларыгар күрэстэһэр кыаҕы үөскэтэргэ уо.д.а. соруктаах ыытылынна.
Куонкурус кыайыылааҕынан Медицина национальнай киинин кардиореанимацияҕа отделениетын анестезиолог-реаниматолог бырааһа Валерия ФОМИНА ааттанна. Кини сотовай телефонна анал мобильнай сыһыарыыны онорбут. Сыһыарыыга оҕолору эмтиир схема, эмтэр өлүүлэрэ төһө буолуохтааҕа, о.д.а. туһалаах иһитиннэриилэр киирбиттэр.
Валерия Фомина Томскайга дойду биир саамай кырдьаҕас, бастын үөрэҕин кыһатыгар – Сибиирдээҕи судаарыстыбаннай медицинскэй университетка үөрэммитэ. 2012 с. дипломын ылан баран, Томскайга кардиология научнай-чинчийэр институтун иһинэн ординатураҕа үөрэнэ хаалбыта уонна анестезиолог-реаниматолог идэтин ылбыта.
Эдэр быраас куонкурус туһунан санааларын маннык үллэһиннэ:
– Эдэр быраастарга аналлаах куонкурус ыытыллара эдэр исписэлиистэргэ олус туһалаах дии саныыбын. Чуолаан, кинилэр быраас быһыытынан салгыы сайдалларыгар, билиилэрин-көрүүлэрин ханаталларыгар уонна бэйэлэрин кыахтарын киэн эйгэҕэ көрдөрөллөрүгэр усулуобуйа үөскүүр.
Ханнык баҕарар эдэр быраас үлэтин аан бастаан саҕалыырыгар элбэх уустуктары көрсөр. Кини күннээҕи үлэтигэр теорияны уонна элбэх информацияны түргэнник, таба туттарыгар ыарахан буолар. Төһө даҕаны элбэҕи ааҕан, үөрэтэн билбитиҥ иһин, ону ыарыһаҕы эмтииргэ сөпкө туттуохха наада. Ордук мин идэбэр, сүрэх ыарыылаах кырачаан оҕолору кытта үлэлииргэ улахан болҕомто уонна эппиэтинэс ирдэниллэр. Ол иһин, мин бэйэбэр уонна эдэр анестезиологтарга көмө буоллун диэн, сотовай телефонна анал мобильнай сыһыарыыны онорбутум. Манна оҕолору эмтиир схема, эмтэр өлүүлэрэ, о.д.а. туһалаах информациялар бааллар. Бу бырайыакпынан эдэр быраастар куонкурустарыгар кытынным уонна кыайыылааҕынан таҕыстым.
Эдэр быраас уонна эмчит буолуон баҕалаах оҕолору ыра санааларын толороллоругар туохтан да толлубакка, иннилэрин диэки эрэллээхтик баран иһэллэригэр ынырабын. Киһи санаатын күүһүнэн тугу барытын кыайар.
