Саха сирин фермердэрин 70% хас биирдиилэрэ 20 гааттан аҕыйах сирдээхтэр-уоттаахтар. Саха сиригэр гектар сири биэрии фермерскэй хаһаайыстыба эйгэтин лаппа сайыннарыаҕа. Ити туһунан бааһынай хаһаайыстыбалар уонна кооперативтар ассоциацияларын салайааччыта Валерий Ефремов СИА-ҕа эттэ.
«Фермердэр бу көҕүлээһини биһирии ылыннылар. 90-с сыллартан ыла нэһилиэнньэлээх пууннартан чугас баар тыа хаһаайыстыбатыгар анаммыт сирдэр кэтэх бас билиигэ ылыллыбыттара. Итинтэн сороҕо билигин аналынан туттуллубат. Бу сирдэргэ хайаатар да инвентаризация барыахтаах, ким бас билиитигэр баара чопчу баһаарыллыахтаах», —диэтэ Валерий Ефремов.
Фермердэргэ олус ыраах сир бэриллэрин, ити сиртэн баһыйар үксэ ойуур фондатыгар киирэрин, оттон ол федеральнай сокуон дьайыытынан хабылларын кини ойуччу тутан бэлиэтиир.
От ыйын 24 күнүгэр Саха сирин баһылыга сылгы хаһаайыстыбаларын салайар дьону кытта көрсүбүтэ. Онно баайга-дуолга, сир сыһыаннаһыыларыгар миниистир Евгения Григорьева күһүн «Саха сирин» гектара диэн аатынан биллибит сокуон барыла киириэҕин, ити түмүгэр ойуур фондатын тыа хаһаайыстыбатыгар туһаныахха сөбүн туһунан эппитэ.
Ефремов этэринэн, фермердэр 70% хас биирдиилэрэ 20-тэн аҕыйах гектар сири бас билэллэр. «Бу тыҥаан турар кыһалҕа бүгүн эрэ саҕаламматаҕа. Нэһилиэнньэлээх пууннар чугастарыгар баар уопсай туһаныллар сирдэргэ докумуон хайдах оҥоһуллара долгутар», — диир ассоциация салайааччыта.
Хаһаайына да суох сирдэр бэриллиннэхтэринэ, маныаха судаарыстыба көмөтө баар буолуохтааҕын Ефремов этэр. «Ыраах сир буоларын курдук, суола-ииһэ суох. Маннык сирдэргэ докумуон, араартааһын үлэтин оҥотторуохха, кадаастыр учуотугар туруоруохха наада. Ону таһынан ханна эрэ мелиорация, эбийиэктэри тутуу үлэтэ ыытыллыахтаах. Дьон сири туһаҕа таһаарарыгар күүс-көмө наада», — диир кини.
