Бэс ыйын 15 күнүгэр Донордар аан дойдутааҕы күннэрин бэлиэтээһиҥҥэ сөп түбэһиннэрэн Уус Алданнааҕы киин балыыһа хааны кутар отделениета саҥа дьиэҕэ киирэр үөрүүлээх малааһына буолла.
Сүүрбэ икки сыл анараа өттүгэр тэриллибит станция бу иннинэ быстах өрөмүөн күүһүнэн сэнэх турбут оҕо куукунатын эргэ дьиэтигэр үлэлээн кэллэ. Хааны кутар станция коллективын, сэбиэдиссэй Дария Николаевна Находкинаны улуус баһылыгын бастакы солбуйааччы Сергей Сестикович Бурнашев, «Биир ньыгыл Россия» политическай партия улуустааҕы салаатыттан Сталина Гуружаповна Данилова, кипин улуустааҕы балыыһа кылаабынай бырааһын солбуйааччы Варвара Анатольевна Чирикова эҕэрдэлээтилэр, махтал суруктары, бэлэхтэри туттардылар. Ону сэргэ донордар Алексей Спиридонович Аммосов, Татьяна Николаевна Ширяева – СӨ Судаарыстыбаннай Мунньаҕын (Ил Түмэн) грамотатынан, Маргарита Васильевна Алексеева “Уус Алдан улууһун социальнай-экономическай сайдыытыгар кылаатын иһин” бэлиэнэн наҕараадаланнылар.
Уус Алдаҥҥа сүрэхтэрин баҕаларынан атын дьон олоҕун быыһыыр сырдык санаалаах 107 донор баар. Ол иһигэр, Россия үтүөлээх донордара – 26-лар. Өр сыл устата хаанын туттаран үгүс дьон олоҕун быыһаабыт Россия бочуоттаах донора Афанасий Ильич Васильев: “Дьоҥҥо көмөлөһөр сыалтан 1985 сылтан хааммын туттарабын. Быйыл 63-пүн туоллум. Хааны туттарыы доруобуйаҕа төрүт буортута суох. Сыл аайы медицинскэй көрүүнү ааһар буолаҥҥын, хата бэйэҥ доруобуйаҥ туругун билэ-көрө сылдьаҕын. Ол үчүгэй. Онон, эдэр дьону доруобуйаҕытын көрүнэ таарыйа, дьоҥҥо үтүөнү оҥоруҥ диэн ыҥырыам этэ. Саҥа дьиэҕэ киирбиттэриттэн үөрдүм, кэҥээбит. Хааны кутар станция дьоҕус коллективыгар таһаарыылаах үлэни, тус олохторугар дьолу-соргуну баҕарабын”.
