Дьокуускайга «Иһитиннэрэр технологиялар. Телекоммуникациялар. Сибээс. Куттал суох буолуута» уонна «СахаПромЭкспо. Саха сирин сир аннынааҕы баайа. Анал тиэхиньикэ. Экология. Газификация» регионнар икки ардыларынааҕы быыстапка буолла.
«Кыайыы 50 сыла» спорт комплексыгар ыытыллыбыт быыстапкаҕа дойду 15 субъегыттан 50-тан тахса компания кытынна.
Дьокуускай куораттааҕы Медицина киинин ыарыһахтары өйөөһүҥҥэ уонна арыаллааһыҥҥа киинин сэбиэдиссэйэ Марианна Степанова быраастарга хайдах суруйтарар туһунан ноутбукка көрдөрө-көрдөрө кэпсээтэ.
«Билигин бырааска регистратура нөҥүө буолбакка, Интернеттээх сиртэн дьиэттэн уонна даачаттан суруйтарыахха сөп. Ол эбэтэр, бырааска көрдөрөргө er14.ru сайтка страховкаҥ полиһын нүөмэрин, бырааскын, көрдөрөр бириэмэҕин суруйан ыытаҕын. Баҕарар буоллаххына, толуон таһаартарыаххын сөп. Оччоҕо регистратураҕа аараабакка эрэ, тута бырааскар киирэҕин», – диэн Марианна Афанасьевна быһаарда.
Дьокуускай куораттааҕы Медицина киинин поликлиникатыгар ыраахтан олорон, хас да көрүҥү тутуһан суруйтарыахха сөп:
- Www.er14/ru сайтынан;
- «СӨ бырааһыгар суруйтарыы» босхо мобильнай сыһыарыынан;
- судаарыстыбаннай уонна муниципальнай өҥөлөр порталларынан;
- Дьокуускай к. Call-киин 21-93-03 төлөпүөнүнэн;
- Дьокуускай к. колл-киин 500-003 төлөпүөнүнэн;
- поликлиникаларга баар инфоматтарынан.
Аныгы иһитиннэрэр технологиялар эһиги бириэмэҕитин табыгастаахтык туһанаргытыгар уонна былааннанаргытыгар туһалаах. Кылаабынайа, уочарата суох.
