Уйбаан Белолюбскай бирииһигэр ыытыллар «Чөмпүйүөн Куубага» диэн күрэхтэһии төрдүс төгүлүн олунньу 10 күнүгэр ыытыллыаҕа. Өрөспүүбүлүкэбит аҕыс ааттаах спортсмена илин-кэлин түсүһүөҕэ. Күрэхтэһии Дьокуускай куоракка «Триумф» спорт комплексыгар тэриллиэҕэ.
Олунньу 5 күнүгэр «Модун» спорт национальнай көрүҥнэрин киинигэр күрэхтэһии куубагын сүрэхтэниитэ буолла. Түөрт киилэ ыйааһыннаах уонна 50 см үрдүктээх куубагы «Офсет» тэрилтэ оҥордо. Сувенирдары оҥорор сыах маастара Александр Оконешников бэйэтэ кэлэн тугун-ханныгын кэпсээтэ, оҥоһугун билиһиннэрдэ: «Үксүгэр куубактар биир халыыбынан оҥоһуллаллар, ньаалбаан уһаарыылаах буолааччылар. Оттон мин саҥа матырыйааллары туһанан ураты көстүүлээх куубагы оҥорорго дьулустум. Сахалар сүгүрүйэр бөрө кыылын моһуона уонна иннигэр Уйбаан кыайыытын өрөгөйдүү турар статуэтката бааллар».
Уйбаан Белолюбскай бэйэтэ иһитиннэрэринэн, бу куубак хас сыл аайы кыайыылаахха көһөн иһэр, эбиитин кыайыылаах аата суруйуллан, куубак үрдээн иһэр буолар эбит.
ЫСПЫРААПКА:
Үтүө үгэскэ кубулуйбут күрэхтэһии «Дыгын оонньууларын» сэттэ төгүллээх чөмпүйүөнэ Уйбаан Белолюбскай бирииһигэр ыытыллар. Манна сыллата бастыҥтан бастыҥ боотурдар күөн көрсөр биир бастыҥ спортивнай күрэхтэһиилэрэ буолар. Күрэхтэһии бырагырааматыгар сэттэ көрүҥ баар: «үс төгүл үс» ыстаҥа, оҕунан ытыы, тутум эргиир, мас-рестлинг, хапсаҕай, сүүрүү уонна ыараханы көтөҕүү.
Ааспыт сылга кыайыылааҕынан Хаҥалас улууһун ааттааҕа, «Дыгын оонньууларын» икки төгүллээх чөмпүйүөнэ Егор Филиппов буолбута. Быйыл кинини утары Нам улууһуттан Артем Варданян, Антон Тойтонов, Тааттаттан Николай Матаннанов, Амматтан Леонид Филиппов, Үөһүү Бүлүүттэн Алексей Иванов, Горнайтан Дьулустаан Ноговицын уонна Өлүөхүмэттэн Иннокентий Миронов күрэхтэһиэхтэрэ.
