Илиҥҥи экэнэмиичэскэй форум кэмигэр «АЛРОСА» хампаанньа уонна СӨ Бырабыыталыстыбата Мииринэй оройуонун Удачнай куоратыгар гаас ситимин киллэрэргэ сөбүлэҥ түһэристилэр. Докумуоҥҥа хампаанньа генеральнай дириэктэрэ Сергей Иванов уонна СӨ Бырабыыталыстыбатын бэрэссэдээтэлэ Владимир Солодов илии баттаатылар.
Күн бүгүн Удачнайы сылааһынан уонна итии уунан хааччыйарга уот күүһүн тутталлар. Ол эрэн, уот инфраструктурата куораты эрэллээх уонна тиһигин быспат гына кыайан хааччыйбат.
Бырайыак чэрчитинэн, Удачнай хочуолунайын оборудованиетын уонна хампаанньа эбийиэктэрин уоттан арааран, айылҕа гааһыгар көһөрүөхтэрэ. Маны олоххо киллэрэргэ Айхал-Удачнай хайысхатынан 60 км уһуннаах гаас турбатын, гааһы үллэрэр ыстаансыйаны, куорат иһинээҕи гаас утаҕын, икки хочуолунай, итиэннэ «Удачнай» сир аннынааҕы шахтатын сылытарга анал оборудование тутуохтара. Тутууну 2020 сыл иккис аҥаарыгар саҕалаан баран, 2023 сыл ититэр сезонугар бүтэриэхтэрэ. Барыллаан ааҕыынан, бу бырайыакка 5,8 миллиард солкуобай үбү угуохтара.
Эниэргийэнэн хааччыйыы саҥа көрүҥэ киирэн, саахал тахсыыта лаппа аҕыйыаҕа. 2028 сылтан инвест-бырайыак ороскуотун толуйдаҕына, Удачнайга ититии төлөбүрэ үс төгүл кыччыахтаах. «АЛРОСА» оҥорон таһаарар салаалара улахан эниэргийэни эрэйэллэр. Бу бырайыак Удачнайга ититии ороскуотун кыччатыа, социальнай-экэнэмиичэскэй сайдыыга тирэх буолуо уонна нолуок быһыытынан өрөспүүбүлүкэ хааһынатыгар эбии дохуот киириэ. Бырайыак төһө ситиһиилээх буолара хампаанньа уонна өрөспүүбүлүкэ дьаһалтатыттан тутулуктаах», — диэн эттэ Сергей Иванов.
Ааптар: Марианна Тыртыкова
