Уһук Илиҥҥэ гектар сири босхо биэрии сокуона күүһүгэр киирэригэр бэлэмнэнии үлэтэ бара турар. Саха сирин былааһын уоргана федеральнай структуралары, олохтоох салайыныы уорганнарын кытта ыкса ситимнээх үлэни ыытар. Ити туһунан өрөспүүбүлүкэ баайга-дуолга, сир сыһыаннаһыыларыгар миниистир Евгения Григорьева эттэ.
«Дьоҥҥо сири босхо биэрии саҕаланар түһүмэҕэр бастакынан Нерюнгри оройуона талылынна. Тоҕо диэтэххэ, оройуон инфраструктурата, тырааныспарын схемата, сибээһэ табыгастаах. Уһук Илини сайыннарыы министиэристибэтин, Росреестр территориятааҕы управлениетын, Росимущество, ойуур сыһыаннаһыыларыгар департаменын, олохтоох салайыныы уорганнарын кытта тэрээһин үлэтин ыытабыт», — диэтэ Евгения Григорьева.
Бүгүҥҥү туругунан түмүктүүр түһүмэххэ федеральнай информационнай систиэмэни оҥороллор. Бу дааннайдара дьоҥҥо-сэргэҕэ тарҕанар кадаастыр каартатыгар киллэриллэр. Мантан тирэҕирэн Уһук Илиҥҥэ сир түҥэтиллиэҕэ.
Баайга-дуолга, сир сыһыаннаһыыларыгар миниистир сокуон олоххо киириитин: сайабылыанньаны биэрии, ол төһө кэмҥэ көрүллэрэ, учаастагы биэриини аккаастааһын ханнык быраапка олоҕурарын, сири арендаҕа ылыы, тус сыаллаахтык туһаныы, о.д.а. дуогабардары түһэрсии туһунан сиһилии кэпсээтэ.
Холобур, дьон сайабылыанньата 20 күн устатыгар көрүллүөхтээх. Аккаастыыр 25 төрүөт баар.
Улахан эппиэтинэс олохтоох бэйэни салайыныы уорганыгар сүктэриллэр. Кинилэр сири биэрэри дуу, биэрбэти дуу быһаараллар.
Саха сирин киллэрбит этиитэ, көннөрүүтэ сокуоҥҥа киирбитин санатар тоҕоостоох. Олохтоох нэһилиэнньэ баҕатын учуотатан элбэх сир сокуон дьайыытыттан таһаарыллыбыта.
Саха сирин былааһын уоргана сокуон олоххо киириитин бастакы түһүмэҕин ырытыахтара. Ити түмүгэр олоҕуран этиилэри киллэриэхтэрэ.
Бүгүн, ыам ыйын 6 күнүгэр Уһук Илини сайыннарыы министиэристибэтин кытта видеоконференция нөҥүө өссө төгүл дьүүллэһиэхтэрэ.
