РФ Үлэ геройа Михаил Николаевич Готовцев 70 сааһын туолар үбүлүөйүгэр сыһыары тутан дьоҕус тыа хаһаайыстыбатын академиятын өрөспүүбүлүкэтээҕи 10-с форума уонна “21-с үйэ тыатын сиригэр ыччат интеллектуальнай кыаҕын туһаныы” диэн 9-с өрөспүүбүлүкүтээҕи научнай-практическай конференция саҕаланна.
Бүгүн, сарсын Дьокуускайдааҕы тыа хаһаайыстыбатын научнай-чинчийэр институтугар оскуола оҕолоро, биология, химия, география, экология, математика, информатика, технология учууталлара, производственнай үөрэх уһуйуллааччылара, маастардара, агрооскуолалар салайааччылара, устудьуоннар, аспираннар, наука үлэһиттэрэ, министиэристибэлэр, үрдүк үөрэх бэрэстэбиитэллэрэ мустан араас хайысханан “дьоҕус оскуолаларга”, семинардарга, секцияларга дьарыктаныахтара.
Агропромышленнай хайысхалаах оскуолалары саҥа стандартар усулуобуйаларыгар сөп түбэһиннэриигэ учууталлар көрсөр кыһалҕаларын, ону быһаарар соруктары ылыныахтара. “Бу тиэмэнэн анал семинар буолуоҕа. Онно билигин өрөспүүбүлүкэҕэ үлэлиир агрооскуолалары өссө байытан, чиҥэтэн, сайыннаран үлэлэтии туһунан кэпсэтиэхтэрэ. Ону сэргэ оҕолор научнай-чинчийэр, барайыактыыр үлэҕэ кыттыылара, оскуола аттынааҕы учаастактарга сааскы үлэлэри тэрийии курдук көдьүүстээх тиэмэлэринэн маастар-кылаастар былааннаналлар”, — диэн Саха сирин научнай киинин пресс-сулууспатын салайааччыта Ньургуйаана Стручкова иһитиннэрэр.
Тэрээһин чэрчитинэн профессор, ветеринария наукатын доктора, Аҕа дойду сэриитин бэтэрээнэ С.И. Исаковка анаммыт кинигэ сүрэхтэниитэ буолуоҕа.
