Билигин хас биирдии, бэл кыра да нэһилиэк бигэргэммит Генеральнай былааннаах буолуохтаах, оччоҕуна биирдэ тутуу ыытарга көҥүл бэриллэр. Тутууну ыытарга сири сөпкө докумуоннааһын туһунан СӨ архитектуратын уонна тутуу комплексын миниистирэ Вера Кузакова иһитиннэрдэ.
131 №-дээх федеральнай сокуон чэрчитинэн, улуустар муниципальнай оройуон сирин былаанын схематын бигэргэтиэхтээхтэрин, онно сөп түбэһиннэрэн тутууга көҥүл биэриэхтээхтэрин, дьонтон, тэрилтэлэртэн сири туһаныы быраабылатын ирдиэхтээхтэрин миниистир эттэ.
Сири туһаныы быраабылата РФ куораты тутуу туһунан кодексатыгар эппиэттэһиэхтээх. Сокуоҥҥа сөп түбэһиннэрэн оҥорботох муниципальнай тэриллиилэргэ тутууга көҥүл бэриллибэт.
Мунньахха мустан олорооччулар үп-харчы көрүллэн, тендер ааспыта даҕаны, сир кыайан докумуоннаммакка тыа сиригэр оскуола тутуута тардыллан, тохтоон хаалбыта үлэҕэ харгыстары үөскэтэрин, ону хайдах туоратыахха сөбүн ыйыталастылар.
Билиҥҥи олоххо, кырдьык көҥүлэ суох ыт уйатын да туппаккын, кыра да тутуу барыта докумуоннаммыт, генеральнай былааҥҥа, федеральнай сокуоҥҥа барытыгар сөп түбэһэр буолуохтаах. Онтуҥ суох буоллаҕына хаһан баҕарар көтүрүөхтэрин, күрдьэн илдьэ барыахтарын син. Улуус дьаһалталарыгар итинэн быһаччы дьарыктанар идэлээх дьон баар эрэ түгэннэригэр сири туһаныы, туттуу курдук эппиэтинэстээх дьыалаҕа сыыһа-халты тахсыа суоҕа.
