Цеолиттан тутуу матырыйаалын оҥоруохтара

0
275

Сунтаардар цеолиттан тутуу матырыйаалын оҥорон таһаарар сыаҕы үлэлэтэр санаалаахтарын туһунан улуус баһылыга Анатолий Григорьев «АЛРОСА» АХ бастакы вице-президенэ-толорооччу дириэктэрэ Игорь Соболевы кытары көрсүһүү кэмигэр иһитиннэрдэ.


 

Билигин улууска цеолиты хостооһунунан уонна батарыынан «Сунтаарцеолит» ХЭУо дьарыктанар. 2011 сылтан саҕалаан «АЛРОСА» АХ кытары ыкса үлэлэһэн, хампаанньа сыллата цеолиты атыылаһар кээмэйэ улаатан иһэр. Ол курдук, «АЛРОСА»-лар туттуллубут ууларын ыраастыырга анаан сылга 35 тыһ. тонна цеолиты ылаллар. Сунтаар улууһун дэлэгээссийэтэ Мирнэйгэ сырыытын кэмигэр, «АЛРОСА» АХ салалтатын кытары көрсөн, цеолит сыаҕын тутуу туһунан кэпсэттилэр. Кэпсэтии түмүгүнэн, үбүлээһин кээмэйин ыйан туран, официальнай суругу акционердар мунньахтарыгар киллэрэргэ сүбэлэстилэр.

Кэмпэндээйиттэн 20-чэ килэмиэтирдээх сиргэ баар Хоҥуру хайатыгар күөх дьүһүннээх таас баара ааспыт үйэ саҥатыгар биллибитэ. Минералы сииктээх оту кэбиһэргэ, сыты суох оҥорорго, оннооҕор медицина5а туһанар буоллулар. Цеолиты хостоон, бытарытан туһаҕа таһаарыы 1989 сылтан биирдэ саҕаламмыта.

Улуус баһылыгын көмөлөһөөччүтэ Тимур Иванов «Эдэр саас» сайтка: «Баһылык А.В. Григорьев Удачнайдааҕы хайа-байытар кэмбинээт дириэктэрэ А.Ф.Махрачевы кытары көрүстэ. Ол курдук, Өлөөҥҥө Үөһээ Мууна сирин туһаҕа таһаарыыга үрдүк категориялаах суоппардар, автоэлектриктэр, автослесардар уо.д.а. идэлээх дьоҥҥо наадыйалларын бэлиэтээтилэр. Инньэ гынан, бу күһүн Удачнайдааҕы ХБК улууспут дьонун алмаас бырамыысыланнаһыгар сыһыарар курдук, үлэ дьаарбаҥкатын ыытарга, үөрэтэргэ, стажировкалыырга бэлэмин туһунан эттэ. Тыа хаһаайыстыбатын бородууксуйатынан, ол иһигэр арыынан, үүтүнэн, сүөгэйинэн, хортуоппуйунан, хаппыыстанан уонна да атын аһынан-үөлүнэн кэмбинээти хааччыйар туһунан сүбэлэстибит”, – диэн  Сунтаар улууһун дэлэгээссийэтэ Мирнэйгэ сырыытын туһунан кэпсээтэ.

edersaas.ru

0
0

Хоруй суох

Хоруйдаа