Камал аатынан татаар тыйаатыра Саха сиригэр бастакы кэлиитэ буолар. Онон сибээстээн, тыйаатыр кэлэктиибэ Үс Хатыҥ сиригэр сырытта. Үс Хатыҥҥа кинилэргэ анаан уот иччитин аһатыы сиэрин-туомун көрдөрдүлэр, хомуска оонньоон иһитиннэрдилэр, ол кэннэ Саха тыйаатырын кэлэктиибин кытта оһуохайдаатылар. Делегацияҕа барыта холбоон 40 киһи, бу иһигэр артыыстар, администрация үлэһиттэрэ, мусукааннар киирбиттэр.
“Биһиги Саха сиригэр үктэниэхпититтэн ыла, барытын олус интэриэһиргээн көрдүбүт, эһиги айылҕаны кытта хайдах курдук ыкса ситимнээхтик олороргутун бэлиэтиэм этэ. Бүгүҥҥү тэрээһиҥҥэ саамай сөбүлээбитим оһуохай буолар, тоҕо диэтэххэ, күүстээх баҕайы үчүгэй энергетикалаах”, — диэн санаатын үллэстэр Татаар Өрөспүүбүүлүкэтин норуодунай артыыһа Люция Хамитова.
Афанасий НОЕВ, «Саха сирэ» хаһыат, edersaas.ru
