Бу кредитнэй тэрилтэ Арассыыйаҕа 220 миэстэҕэ хаалан, өрөспүүбүлүкэ банковскай салаатыгар улахан сабыдыала суоҕун ыйбыттар. Дойду Киин бааныгар эппиттэринэн, «Таатталар» сүрүн кыһалҕалара тэрилтэ балансатыгар намыһах хаачыстыбалаах актив мунньуллубутуттан тахсыбыт. Ону сэрэйбит курдук баан салалтата лицензия былдьаныан иннинэ бэрт ыксалынан активтарын таһаара охсубуттар. Кинилэр хамсаныылара бэрээдэги көрөр уорганнарга биллэриллиэхтээҕин Киин баан этэр.
Билиҥҥитэ «Таатта» бааҥҥа быстах кэмҥэ үлэлиир дьаһалта тэрилиннэ. Баан лицензията былдьаныан сөбүн туһунан икки күн эрдэ сэрэтии сурах тарҕаммыта. Ол күнтэн ыла от ыйын 3 күнүттэн тэрилтэ дьон харчынан уурдарыытын ылбат буолбута.
Сокуон ирдэбилинэн, баан лицензията былдьаннаҕына, нэһилиэнньэ уурдарбыт харчытын страховкалааһын быһыытынан 100% төнүннэриэхтээхтэр, ол эрэн, үп кээмэйэ 1,4 мөл. солк. куоһарыа суохтаах. Ити сууматтан элбэх харчы уурдарыллыбыт түгэнигэр бааҥҥа сөптөөх харчы баар түгэнигэр биирдэ хаһаайыныгар төттөрү бэриллэр.
«Таатта» баан 1990 с. тэриллэн үлэлээтэ, РФ Киин баанын иһитиннэриитинэн, хас да чааһынай киһи баан акционердара буолаллар, тэрилтэ ыраас актива 8 млрд. солк., кредитнэй бартыбыала – 4 млрд. солк. үөһэ, нэһилиэнньэ иннигэр 5 млрд. солк. эбэһээтэлистибэлээх.
Марианна Тыртыкова, «Саха сирэ», edersaas.ru, СИА.
