Таатта улууһун Дэбдиргэ нэһилиэгэр Ньимиидэ үрэҕэр турбут ойуур баһаара кутталламмытын туһунан бүгүн, балаҕан ыйын 15 күнүгэр, улуус киинигэр буолбут сүбэ мунньахха иһитиннэрдилэр. Билиҥҥитэ баһаары умулуннарыыга 11 киһи, 10 трактор үлэлиир. Эбии Уолбаттан — 25, Дэбдиргэттэн — 50, «Лесавиа» тэрилтэтиттэн 7, Боробултан 20 киһи тахсарын күүтэллэр. Бу туһунан ulus.media суруйар.


Маны таһынан Тыараһа нэһилиэгэр 135 га ойуур сир уонна 135 га хонуу сир умайа турар. Уопсайа 31 киһи, 2 ДТ-75 тыраахтардар үлэлииллэр. Ол иһигэр 13 парашютнай, 3 десантнай-парашютнай сулууспа үлэһиттэрэ уонна олохтоох нэһилиэнньэттэн 20 киһи түүннэри-күнүстэри үлэлииллэр. Бэҕэһээ 6 килэмиэтир сири уот киирбэт гына төгүрүппүттэр.

Ойуур баһаардара Боробул, Чөркөөх, Хара Алдан, Уус Амма, Уолба нэһилиэктэригэр кутталлаахтарынан, биригээдэлэр тахсан үлэлии сылдьаллар. Нэһилиэктэр дьаһалталара астарын-үөллэрин, уматыктарын, техникаларын быһаараллар.

Нэһилиэк баһылыктара сорох ыаллар алталыы, үстүү кэбиһиилээх отторун уокка былдьаппыттарын, үүтээннэр умайбыттарын иһитиннэрдилэр. Улуустааҕы тыа хаһаайыстыбатын управлениетын кылаабынай зоотехнига Григорий Таппыров хоромньуну төнүннэрии боппуруоһугар тыа хаһаайыстыбатын министиэристибэтигэр үлэлэһэ, хоромньуну чуолкайдыы сылдьарын эттэ.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.