Муус устар 12 күнүгэр Дьокуускай к. Главпочтамҥа чэпчэтиилээх сурутуу чэрчитинэн «Үтүө санаа умнаһа» («Дерево добра») ааксыйа ыытылынна.
edersaas.ru
Ааксыйаҕа дьоҥҥо-сэргэҕэ биллэр дьон, миниистирдэр, дьокутааттар, суруйааччылар, искусство үлэһиттэрэ, бизнесменнэр кэлэн, кыаммат араҥа дьоҥҥо, кинилэр тэрилтэлэригэр уонна оҕолорго анаан хаһыаттарга, сурунаалларга суруйтаран, ааксыйаҕа кыттыстылар.
СӨ норуодунай бэйиэтэ Иван Мигалкин, СӨ норуодунай суруйааччыта Сэмэн Тумат «Чолбон» сурунаалы ааҕааччыларга суруйтардылар. «Далбар Хотун» күрэс бастакы кыайыылааҕа Лидия Афанасьева араас сыллар кыайыылаахтарын кытары «Далбар Хотун» сурунаалы өрөспүүбүлүкэ улуустарыгар олорор инбэлииттэргэ, бэтэрээннэргэ (аҕыстыыны) анаан суруйтардылар. СӨ үөрэххэ уонна наукаҕа миниистирин бастакы солбуйааччы Феодосия Габышева дьиэ кэргэн сөбүлээн ааҕар сурунаалын Үөһээ Бүлүү улууһугар Исидор Барахов аатынан оскуолаҕа, төрөппүт көрүүтэ-истиитэ суох хаалбыт тулаайах оҕолорго көмөлөһөр кииҥҥэ, Андреевскай с. «Сардаана» 4 №-дээх оҕо уһуйааныгар, Хомустаах оскуолатыгар, Куду начаалынай оскуола-саадыгар уонна Горнай улууһугар Бэрдьигэстээх с. орто оскуолатыгар, Кировскай нэһилиэк оҕо уһуйааныгар, Софрон Данилов аатынан Мытаах орто оскуолатыгар суруйтаран бэлэхтээтэ.
«Дьокуускай к. нэһилиэнньэтин социальнай хааччыйыы биир кэлим киинин» дириэктэрэ Наталья Пахомова көмөтүнэн өрөспүүбүлүкэ 17 ааҕааччыта «Забота-Арчы» хаһыаты тутар буолла.
Ити курдук, бу күн үтүө санаа өрөгөйүн үгүс киһи билэн, үөрэн-көтөн тарҕаста.
Надежда ЕГОРОВА, «Саха сирэ» хаһыат, edersaas.ru
