19 Кулун тутар 19.03
  • -9°
  • $ 91,98
  • 100,24

Түөкүттэр “Инстаграмы” буулаабыттар

14:30, 22 ноября 2017
Текст:
Читайте нас на
Яндекс Новости
ЯДВ

“Инстаграмы” көрө олордоххо, араас реклама көстөн кэлээччи. Арай, онно: “Судаарыстыба көмөтүн ылыаххын баҕараҕын? 10000 солкуобай!” диэн суругу интэриэһиргээн, арыйан көрдүм.


Дьэ, Money Prime диэн сайт арыллан кэллэ. Иһитиннэрии сүрүнэ маннык:

Интэриниэттиир трафикпын атыылыахпын сөп үһү. Буолаары буолан, 500 тыһыынча сайт атыылаһарга бэлэм үһү. Кинилэр трафиктара үрдээтэҕинэ, Google, Яндекс курдук “көрдөтөөччүлэргэ” үчүгэй буолан көстөллөр эбит. Ол иһин көннөрү дьонтон трафик атыылаһарга бэлэмнэр үһү. Ону бу сайт барыларыгар мин трафикпын атыылыыр, оччоҕо миэхэ күн аайы халлаантан 37-лии тыһ. солк. түһэр. Дьэ, бу Байанайым “мичик гыннаҕын” көрүҥ эрэ! Таах олорон эрэн, аҕыйах ыйынан миллионер буолан бүттэҕим дии!

Салгыы хайдах эбитий диэтэххитинэ, сайт өҥөтүн иһин сыччах 75 солкуобайы көрдүүр. Онтукатыгар каартаҥ нүөмэрэ, электроннай аадырыһыҥ, төлөпүөнүҥ барыта наада. Онтон салгыы өссө туохха эрэ бииртэн биир 550, 825, 1254, 1120, 1500, 1125… солкуобайы көрдүүр, бэлэм сылтахтары булан иһэр.

Биллэн турар, бу түөкүттэр сайтара. Дьон тугу да үлэлээбэккэ эрэ, түргэнник байа охсор баҕаларын туһанар. Манныкка киирэн биэрэр дьон үгүс эбит.

Түөкүттэр аадырыстарын уларыта сылдьаллар, хас да сайтаахтар. Олор бу бааллар: montime.ru, sell-plus.ru, http://moneyprimes.com, monprime.ru, monprimed.ru, investrmoney.ru, sioks.cf, timesmoney.ru, aftertheworld.ru

Ол эрээри сайтарын ис хоһоонун букатын уларыппаттар, ойуута, суруга-бичигэ барыта биир көрүҥнээх. Аллара диэки сымыйа “туһанааччылар” хайдах курдук байбыттарын, харчы ылан туһаммыттарын туһунан суруйбуттар. Биллэн турар, дьон итэҕэйдин диэн.

Дьиҥин ыллахха, трафик атыыта диэн – суос-сымыйа. Ким да трафигы атыыласпат. Интэриниэт-трафигынан анал көҥүллээх провайдердар эрэ дьарыктаныахтарын сөп. Санаан да көрдөххө, 500 тыһыынча сайтка атыылыыр курдук улахан трафик көннөрү туһанааччыга хантан кэлиэй? Оннооҕор биир ыйга тиийимээри сордооччу дии…

Оттон бу түөкүттэр тэрилтэлэрин аадырыһа: ООО «М-Прайм-Групп»: Москва, Пресненская набережная, 12 диэн. Бу аадырыска атын тэрилтэлэр бааллар, оттон “М-Прайм-Групп” диэн тэрилтэ ханна да регистрацияламматах.

Төһө да байа охсор баҕа баарын иһин, бу албыҥҥа киирэн биэримэҥ! Кимиэхэ да каартаҕыт нүөмэрин, паролун суруйумаҥ. Түөкүттэр дьон Интэриниэт эйгэтин ситэ билбэтинэн, итэҕэйимтиэтинэн туһанан, араас албастары толкуйдууллар. Холобур, аныгы кэмҥэ криптовалюта, инвестиция, ааксыйанан эргинии, о.д.а. курдук киһи үчүгэйдик билбэт эйгэлэригэр үөрэтэн, бэрэбиэркэлээн көрөн баран эрэ, кыттыахтаах. Уопсайынан, чэпчэки харчыттан сэрэниҥ.

Биллэн турар, билигин Интэриниэт нөҥүө араас бизнес көрүҥэ сайдан турар. Ордук “Инстаграмҥа” атыы-тутуу, реклама бөҕө. Ол эрээри, харчыны “мобильнай баан” нөҥүө ыытар буоллаххытына, сэрэхтээх буолуҥ. Барытыгар итэҕэйэр сыыһа. Муҥ саатар, Интэриниэккэ киирэн көрдөтөн, хайдаҕын-тугун, дьон тугу суруйбутун ааҕан, үчүгэйдик толкуйданан баран, төлөөҥ.

Следите за самым важным и интересным в Telegram-канале и WhatsApp-группе ЯСИА