Түгэһиир нэһилиэгин ытык мааны кырдьаҕаһа, үлэ, тыыл бэтэрээнэ Евдокия Львовна Колесова 90 сааһын туолла. Кинини олохтоох дьаһалта баһылыга Егор Васильев уонна улуустааҕы социальнай харалта үлэһиттэрэ үөрүүлээх быһыыга-майгыга эҕэрдэлээтилэр.
Эбээн-Бытантай улууһун ытык кырдьаҕаһа Евдокия Львовна Колесова Арассыыйа Президенэ Владимир Путин уонна Саха Өрөспүүблүкэтин Ил Дархана Айсен Николаев ааттарыттан эҕэрдэ, өйдөбүнньүк бэлэх тутта. Кини алтынньы ыйга 90 сааһын томточчу туолла.
Евдокия Львовна оҕо, эдэр сааһа сэрии ыар кэмнэригэр ааспыта. Кини маҥнай табаһыттаабыта. Онтон өр сылларга оскуола иннинээҕи саастаах оҕону иитии эйгэтигэр эҥкилэ суох үлэлээбитэ.
Дьылҕа-хаан ыйааҕынан Евдокия Львовна соҕотох хаалбыта. Билиҥҥи кэмҥэ ытык кырдьаҕас сылаас сыһыаннаах Николай Кириллович Никитин дьиэ кэргэнигэр үчүгэй көрүүгэ-харайыыга олорор. 90 саастаах кырдьаҕас киһи сүрдээх тэтиэнэх, кинигэ ааҕар, иистэнэр, кроссворд таайарын олуһун сөбүлүүр.
Ааптар: «Бытантай уоттара» хаһыат, Эбээн-Бытантай улууһа
