Чурапчы улууһугар, быйыл саҥа тэриллибит, «Тыа хаһаайыстыбатын агентствотын» көмөтүнэн Г.П.Башарин аатынан Сылаҥ орто оскуолатыгар смарт (өйдөөх) тэпилииссэ таҥыллыбыт. Сонун бырайыагы СӨ бырабыыталыстыбатын бэрэссэдээтэлин солбуйааччы Михаил Никифоров көрдө.
Тэпилииссэ төлөпүөн сыһыарыытын нөҥүө температураны көрдөрөр, бордууһунаны аһар-сабар, аныгы цифровой тиэхиникэ көмөтүнэн уу кутар гына оҥоһуллубут. Тэпилииссэ программист Иннокентий Бекянов толкуйунан, быһаччы көмөтүнэн таҥыллыбыт.
Сылаҥ оскуолата 2018 сыллаахтан «Cмарт среда в условиях сельской школы» бырайыагын салгаан, билигин «Смарт — агро среда в сельской школе» бырайыагын ыалдьыттарга билиһиннэрдэ. Сертификаттаах, бэйэ оҥоруута, от чэйдэринэн күндүлээтэ.
Вице-премьер Михаил Никифоров өрөспүүбүлүкэҕэ бастакынан тэриллибит Агентство холобурун атын улуустарга тарҕатыы тыа хаһаайыстыбатын сайыннарыыга улахан көдьүүстээх буолуон эттэ.
