Учуутал күнүн көрсө Сунтаардааҕы Оҕо дьоҕурун сайыннарар киин (директор Ангелина Антонова) «Учууталгын эҕэрдэлээ» аахсыйаны хаһыс даҕаны сылын тэрийэр.


Сунтаар оҕолоро учууталларга бэйэлэрэ айбыт аккырыыккаларын бэлэхтиэхтэрэ. Оҕо дьоҕурун сайыннарар кииҥҥэ үлэлиир «Graphic ART» студияҕа (педагог Варвара Иванова) дьарыктанар үөрэнээччилэр бэйэлэрэ компьютерга дьэрэкээн дизайнаан аккырыыкка оҥордулар. Бу айымньыларын киин үлэһиттэрэ быйыл 100 устууканы бэчээттэтэн, оҕолор түөрт хамаанданан арахсан, иккилии-үстүү буолан, тэрилтэлэринэн сырыттылар. Билигин үлэ үөһүгэр сылдьар дьон оскуола кэмнэрин, тапталлаах учууталларын санаан, кинилэргэ анаан эҕэрдэ, баҕа санаа бастыҥын суруйдулар. Истиҥ тыллаах аккырыыккалары Учуутал күнүгэр аадырыстарынан, нэһилиэктэринэн тарҕатан, соһуччу үөрүүнү бэлэхтиэхтэрэ.

Аахсыйаны ыыта сылдьааччы көрсүө, элэккэй майгылаах оҕолор тэрилтэҕэ киирээт лоп бааччы сыалларын-соруктарын билиһиннэрбитинэн бараллар. Света Ильина (9″б»,гимназия) уонна Рустам Копылов (9 «а» 1N-дээх орто оскуола) үөрэнээччилэрэ:

Бу аахсыйаҕа аккырыыкка толотторбут дьоммут олус диэн сэргииллэр, маҥнайгы учууталларын иһирэхтик санаан, эҕэрдэлэрин суруйаллар. Биир күнүнэн тута аккырыыккабыт бүтэ оҕуста, сарсын дьаарыстаан, аадырыстарынан тиксэриэхпит, — диэн кэпсииллэр.

Ааптар: Юлия Алексеева, «Сунтаар сонуннара» хаһыат

0
0
comments powered by HyperComments