19 Кулун тутар 19.03
  • -10°
  • $ 91,98
  • 100,24

СССР спортка маастара, тустуу бэтэрээнэ Михаил Ноговицын дойдутугар ойуур баһаарын умулуннарыыга көмөлөстө

16:04, 13 августа 2020
Текст:
Читайте нас на
Яндекс Новости
ЯДВ

Дьааҥы оройуонун уонна Дулҕалаах нэһилиэгин Бочуоттаах олохтооҕо, СӨ үөрэҕириитин туйгуна, Саха сиригэр тустуу спордун сайдыытыгар үтүөлэрин иһин аат хаһаайына, СССР тустууга үс төгүллээх призера, Украина хас да төгүллээх чөмпүйүөнэ, СССР спортка маастара Михаил Васильевич Ноговицын ойуур баһаардара төрөөбүт Дулҕалааҕар тахсыбыттарын истээт, Дьокуускайтан бастакынан кэлээт, күтүөттэрин Констатин Никитини, Сергей Васильевиһы, бырааттарын-уолаттарын кытта уоту умуруорууга сылдьыста.


Билигин ыксаллаах быhыы-майгы тахсыытын сэрэтэр уонна ойуур баhаардарыттан сэрэхтээх буолууну хааччыйар хамыhыйалар быhаарыыларынан, ойуур баhаардарын тэрмичэскэй туочукалара сабылыннылар.

Дьыл күһүҥҥү кэмэ эрдэлээбиккэ дылы. Кыралаан ардахтаах, сөрүүн күннэр ойуур баһаардарын биллэ намыраттылар. Үлэ-сырыы, олох-дьаhах, айан-суол күhүҥҥүлүү салаллар.

Михаил Васильевич өбүгэлэрэ оттоон-мастаан, ынах сүөһү ииттэн олорбут Лэпсэй сирэ-дойдута үөhэ тыыммыкка дылы буолла. Манна халыҥ аймах ытыктыыр убайдарын тула кустаах, алаадьылаах, итии сүөгэйдээх сандалылаах уруккуну-хойуккуну ахта муһуннулар.

«Өбүгэлэрбит, аҕабыт төрөөбүт сиригэр биһиги халыҥ аймах сайын аайы күүс-уох ыла мустабыт. Ойуур уота төрөөбүт сирбитин ылбатын курдук кыһаллабыт, — диир Михаил Васильевич. — Аҕабыт Василий Павлович биһигини үлэҕэ кыра эрдэхпититтэн илдьэ сылдьан үөрэппитэ. Бу Лэпсэй сиригэр сайын ахсын оттоон-мастаан улааппыппыт. Оскуоланы бүтэрбит сылбар оттуу сырыттахпына суругу туттаран кэбиспитэ, баран үөрэн, сарсын куораттыыгын, салгыы Киевкэ үөрэнэ бараҕын диэбитэ. Аҕабыт эппитэ — сокуон. Ол айаннаабытым бэйэтэ туспа кэпсээн». 

Киев физкультурнай институтун бүтэриэҕиттэн, элбэх спортсмены тустуу эйгэтигэр ииппит киһи саха ыччатын үөрэппит, үүннэрбит Арассыыйа биллиилээх тренерин Георгий Анатольевич Бураков 80 сааһын туолуутун бэлиэтиир күнүгэр сылаас махталын биллэрэ, Киевкэ айанныыр баҕа санаатын сэгэттэ.

Михаил Васильевич эдэр сааhын куоратыгар атырдьах ыйын бүтүүтэ айаннаары сылдьар.

Раиса Чирикова.

Следите за самым важным и интересным в Telegram-канале и WhatsApp-группе ЯСИА