Режиссер Андрей Борисов уонна драматурга Владимир Федоров А.С.Пушкин аатынан Нуучча драматическэй акадамическэй театырын сыанатыгар туруорбут «Созвездие Марии» испиктээкилинэн киинэ уһуллар. Ити туһунан бастакы вице-премьер э.т. – баһылык уонна бырабыыталыстыба салайааччыта Юрий Куприянов эттэ.
Юрий Куприянов эппитинэн, улахан историческэй киинэни устууга анаан «Якуцк» дубель-шлюп куоппуйата тутулла сылдьар.
“Атырдьах ыйын 12 күнүгэр Петрозаводскайга үөрүүлээх быһыыга-майгыга маны ууга киллэриэхтэрэ», —диир Юрий Куприянов.
Маннык шлюпка Витус Беринг экспедициятыгар киирэр хоту сир чинчийээччилэрэ кэргэннии Василий уонна Татьяна Прончищевтар Лаптев муоратыгар, Өлүөнэ өрүскэ айаннаабыттара. Судуна XVIII-с үйэтээҕи чэрчинэн үтүгүннэрэн оҥоһулунна.
Киинэни Санкт-Петербург куоракка «Ленфильм» киинэ устудьуйатыгар уонна Саха сиригэр усталлар. Киинэҕэ Андрей Борисов — продюсер, Сардаана Федотова — худуоһунньук, Михаил Егоров — худуоһунньук үлэлииллэр. Ону таһынан саха оператордара уонна артыыстара ыҥырылыннылар.
Хоту сир чинчийээччилэрин дьоруойдуу быһыыларын уонна тапталларын «Каро-Премьер» компания генеральнай дириэктэрэ Алексей Рязанцев уонна «Каро-Продакшн» киинэ компаниятын салайааччыта Юрий Обухов интэриэһиргээбиттэрэ. Киинэни «Каро-Продакшн» устар.
Россия култуураҕа министиэристибэтэ киирбит элбэх матырыйаалтан бу сценарийы талбыта. Онон киинэ судаарыстыба суотугар үбүлэнэр. Ону таһынан Нуучча географическай уопсастыбата үбүлээһини оҥорор. Саха сирин бырабыыталыстыбата, «Ленфильм» үбүнэн-харчынан өйүүллэр.
335 сыл аннараа өттүгэр атырдьах ыйын 12 күнүгэр чинчийээччи Витус Беринг төрөөбүтүн бэлиэтээн ааһар тоҕоостоох.
