Томпо улууһун ыарахан ыйааһыннаах мадьыныта Сергей Фролкин Саха сирин саамай күүстээх мадьынытын аатын ылла. Федор Дегтярев сырдык кэриэһигэр анаммыт муҥутуур кыайыылааҕы быһаарар турнирга аан дойду чөмпүйүөнүн Дмитрий Поповы кыайда.
«Модун» спорт комплексыгар аатырбыт-сураҕырбыт мадьынылар Дмитрий Попов, Эрчим Баппагай, Рустам Ксенофонтов, Сергей Фролкин, Егор Баишев бааллар. Павел Черноградскай, Виктор Докалов уонна Михаил Гоголев суохтара тута биллэр.
Спортан туоруубун диэбит аан дойду чөмпүйүөнэ 47 саастаах Анатолий Баишев күрэхтэһиигэ кытта кэлиитэ соһуччу буолла.
«Аан дойду, Арассыыйа таһымнаах күрэхтэһиилэргэ аны кыттыбаппын. Өрөспүүбүлүкэҕэ мас тардыһарбын тохтоппот санаалаахпын. Сайын Манчаары Оонньууларыгар улууһум аатын көмүскүүр баҕалаахпын», — диэн кини СИА-ҕа эттэ.
Турнирга кини икки утарсааччыларын хотто уонна финал аҥаарыгар таҕыста. Ол эрээри Баишев бырааһын туруорсуутунан кини Дмитрий Попову утары тахсыбата.
Муҥутуур кыайыылааҕы быһаарар күөн көрсүүгэ Томпо оройуонуттан Сергей Фролкин уонна Уус Алдантан Дмитрий Попов таҕыстылар. Дмитрий Попов ситиһиилэринэн Фролкинтан ордук диэн буолар. Оттон Фролкин Поповтан 30 киилэнэн ыарахан ыйааһыннаах. Онон кыайыыны ким ылыа эрдэттэн сэрэйиллэрэ. Сергей Фролкин муҥутуур кыайыылаах үрдүк аатын ылан, Арассыыйа чөмпүйэнээтигэр кытта барыаҕа уонна Виктор Колибабчуктан кыайыыны өрө охсон ыларга дьулуһуоҕа.
«Аан дойду икки төгүллээх чөмпүйүөнэ Виктор Докалов ыйыытынан-кэрдиитинэн дьарыктанабын. Урукку өттүгэр тиэхиньикэ өттүнэн баһыйтарар эбит буоллахпына, билигин балаһыанньа чыҥха атын. Эһиил Виктор Колибабчугу кыайар балысхан соруктаахпын», — диир Фролкин.
Эр дьоҥҥо 70 кг диэри ыйааһыҥҥа аан дойду чөмпүйүөнэ Афанасий Платонов үһүс төгүлүн кыһыл көмүс мэтээли кэттэ.
Эдэр уолаттарга Иннокентий Миронов, кыргыттарга Сайыына Сидорова кыайыы көтөллөннүлэр.
