“Хара сир устун саас маҥнай
Хааман иһэр кэрэтиэн!
Сэрэммиттии аргыый аҕай
Сири көрөн иһэбин…”, – диэн сахалыы эрэ тыллаах барыта саас ахсын, биитэр тапталы иэйэн “Ньургуһуннар” ырыаны ыллыыр. Чахчы да норуот ырыата буолбут хоһоон ааптара, Саха Өрөспүүбүлүкэтин искусствотын үтүөлээх деятеля, “Гражданскай килбиэн” ураты Бэлиэ кавалера, Ньурба улууһун Ытык Киһитэ, драматург, тылбаасчыт, прозаик, Саха театрын литературнай чааһын 1962 сылтан олоҕун бүтэһик күннэригэр дылы салайан олорбут Иннокентий Аксентьевич Дмитриев – Сиэн Чолбодук бу муус устар 12 күнүгэр төрөөбүтэ 85 сааһын туолуохтаах этэ…
Бу бэлиэ күнү муус устар 13 күнүгэр Саха театра аар саарга аатырбыт “Хаарыан хампа күөх кытылым…” испиктээкилинэн бэлиэтээтэ. Бу Чингиз Айтматов суруйбут сэһэнин сахалыы саҥардыбыт уонна сахалыы тыыннаан поэтическай куттаабыт киһинэн И.А. Дмитриев – Сиэн Чолботук буолбута. Испиктээкил 34-тэн тахса сыл тухары хас да көлүөнэ көрөөччү кутун туппута чаҕылхай тылбааһыттан тутулуктааҕа эмиэ саарбаҕа суох.
Онтон муус устар 14 күнүгэр “Ааҕар Саха сирэ” түмсүү көҕүлээһининэн, чуолаан Иван Иванович Шамаев салайыытынан, Респуликанскай лицейгэ Сиэн Чолбодук прозатыгар анаммыт төгүрүк остуол буолан ааспыта. Бу төгүрүк остуолга Иннокентий Дмитриев олоҕун доҕоро Александра Афанасьевна Иннокентьева, уоллара Аксентий Иннокентьевич, чугас дьоно, сиэттэрэ, бииргэ үөрэммит үөлээннээхтэрэ В.В. Протодьяконов уонна М.П. Алексеев – Дапсы, Саха театрын артыыстара ыалдьыттаатылар. Лицей үөрэнээччилэрэ Сиэн Чолбодук тэттик кэпсээннэрэ үөрэх кинигэтигэр киирэллэрэ буоллар диэн этии киллэрдилэр. Ол санааны өйүөхпүт диэн Саха театрын литературнай чааһын үлэһитэ Надежда Осипова тыл эттэ. Төгүрүк остуол түмүгүнэн Сиэн Чолбодук талыллыбыт айымньыларын кинигэтин бэчээттээн таһаарыахха диэн сыал-сорук туруордулар, онно айымньылары талар бөлөҕү тэрийиэххэ диэн сүбэлэстилэр.
Онтон бүгүн, муус устар 21 күнүгэр, НВК Саха “Үчүгэйиэн бу сиргэ” биэриигэ Саха театрын литературнай чааһыттан театровед Надежда Осипова уонна артыыс Кирилл Семенов Сиэн Чолбодук тылбаастарын, бэйэтэ суруйбут пьесаларын, кэпсээннэрэ кинигэ буолан тахсыбыттарын туһунан кэпсээтилэр. Биэриигэ Иннокентий Дмитриев туһунан төрөөбүт дойдутун Ньурба улууһун телевиденията оҥорбут документальнай киинэтиттэн быһа тардан көрдөрдүлэр, Ньурба улууһун норуоднай театрдара кини суруйбут пьесаларынанан испиктээкил туруорууга күрэх ыыппыттарын туһунан иһитиннэрдилэр.
