«Азия оҕолоро» VI Оонньуу иннинэ өрөспүүбүлүкэ баһылыга мас тардыһыыта, ыстаҥа, хапсаҕай олимпийскай испииһэккэ киллэриллэллэригэр эрэнэрин биллэрдэ.
«Россия президенинэн бигэргэммит спорт сайдыытыгар доктринаҕа биэс национальнай көрүҥ киллэриллэ сылдьар, ол иһигэр сахалыы — мас тардыһыыта, хапсаҕай уонна ыстаҥа. Икки бастакы «Азия оҕолоро» Оонньуу бырагырааматыгар баар. Онон бу үс көрүҥ олимпийскай бырагыраамаҕа киллэриллэригэр эрэнэ саныыбын», — диэтэ «Саха» НКИК ханаалыгар Егор Борисов.
Ил Дархан бэлиэтииринэн, «Азия оҕолоро» Оонньуу Олимпиада кыайыылаахтарыгар уонна кыттыылаахтарыгар старт биэрэр былаһаакканан буолар.
Саха спордун төрүт көрүҥнэрэ интэриэһи тардалларын «Азия оҕолоро» Оонньууга кыттар хамаандалар анаан спортсменнары бэлэмнээбиттэрэ буолар.
