Ийэ тылбыт күнүгэр анаан, саха кэскиллээх ыччатын «Түмэн» (http://vk.com/tymenner) түмсүүтэ видеоролигы устан, интернет ситимигэр таһаарда. Видеоролик сыала-соруга — дьону, Сахабыт сирин олохтоохторун, төрөөбүт тылларын убаастыырга, үөрэтэргэ, харыстыырга угуйуу, тардыы.
Видеороликка кыттыыны ыллылар: «Олонхо» тыйаатырын актердара Гаврил Менкяров, Ирина Александрова, саха эстрадатын ырыаһыттара эдьиийдии-балыстыы Ирена, Розалина Файрушиналар уонна Дарья Лаврова, Саха сирин саамай кэрэ кыыһа Александра Павлова, хоһоонньут уонна общественнай деятель Яна Байгожаева, маҥнайгы сахалыы ситком (ситуационнай комедия) «Олох түгэннэрэ» артыыската Елена Ефимова (Лена Шпехт); «Саха» НКИХ «Ыллыктар» сериалын артыыската Сахаяна Алексеева, олус талааннаах оҕобут, “Завод” үҥкүү студиятын иитиллээччитэ Диана Егорова (Lil Di), арчыһыт Александр Саввинов (Алгыстаах Өлөксөөн), «Саха» НКИХ радиотын ыытааччыта Андрей Никифоров, тимир ууһа, хомуһу, быһаҕы оҥоруунан дьарыгырар маастар Иннокентий Седалищев, онкологическай диспансер кылаабынай бырааһа Петр Каратаев, ХИФУ тылга уонна култуураҕа институтун доцена Гаврил Торотоев. Ону таһынан видеороликка «Түмэн» түмсүү оҕолоро, көхтөөх ыччат уонна бу кыһалҕаны өйдүүр дьон кыттыыны ыллылар.
Бүгүҥҥү күн көрдөрөрүнэн, видеоролик дьон хайҕабылын ылбыт, үгүс дьон сэргээбит. YouTube интернет ситимигэр хайыы-үйэ 600-тэн тахса киһи киирэн көрбүт. Ону таһынан, «WhatsApp» мессенджеринэн киһи бөҕөтө олус көхтөөхтүк тарҕатар, бэйэ бэйэлэригэр ыытыһар.
