«Азия оҕолоро» Оонньуу күрэхтэһиитигэр бинтиэпкэнэн буулдьанан ытыыга уолаттар ортолоругар чөмпүйүөннэринэн уонна призердарынан Армения, Бангладеш уонна Саха сирин спортсменнара буоллулар.
Армения кыраҕы харахтааҕа Айк Бабаян эрэллээхтик кыайда, 208,1 баллаах. Чугастааҕы утарсааччытын сэттэ очкуонан хаалларда. Иккиһи Бангладештан Абу Суфьян ылла. Саха сириттэн Ян Цой күүстээх киирсии кэнниттэн, үһүс буолары ситистэ.
«Буулдьанан ытыынан үһүс сылбын дьарыктанабын. Россия таһымнаах күрэхтэргэ кыттыбытым, финалга киирбитим. Үксүгэр 4-с миэстэни ыларым. Үс иһигэр бастакы киириим. Ситиһиллибитинэн тохтоон хаалар санаам суох, салгыы үлэлиэм», — диэтэ СИА-ҕа саха бэргэн ытааччыта.
Бу көрүҥҥэ күрэхтэһиигэ барыта биэс сүүмэрдэммит хамаанда бэрэстэбиитэлэ кытынна.
