Саха сирин ханна да суох тыйыс тымныытын наука уонна экономика сайдыыларыгар туһаныахха сөп. Ити туһунан өрөспүүбүлүкэ баһылыга Егор Борисов ТАСС иһитиннэрэр агенствоҕа биэрбит интервьютугар эттэ.
«Биһиги сүтэн эрэр үүнээйилэри харайар туһуттан Россияҕа ханна да суох криохранилищены туппуппут. Ирбэт тоҥ маныаха эбии ороскуоту үөскэппэт», — диир Егор Борисов.
Кини этэринэн, хайа баҕарар матырыйаал тымныыны төһө тулуйумтуотун өрөспүүбүлүкэҕэ бэрэбиэркэлиэххэ, боруобалыахха сөп. «Ити авиация тутуутугар ордук наадалаах. Биһиги региоммутугар уһун кэмнээх тымныы туруон сөп. Онон улахан ороскуоту көрсүбэккэ эрэ боруобалааһыннары ыытарга табыгастаах. Россия наукаларын академиятын кытта климакка боруобалааһын киинин тутар былааннаахпыт. Ону таһынан тымныы эниэргийэни биэрэрин умнар сатаммат. Тымныыны электроэниэргийэҕэ кубулутар технологиялары толкуйдуохтаахпыт” — диир Борисов.
Глобальнай ириэриигэ ураты улахан болҕомто уурулларын кини этэр. «Саха сирэ ирбэт тоҥнооҕунан маннык ириэрии тулалыыр эйгэҕэ дьайыытын билэр наадалаах. Билигин Самойловскай арыыга ити чинчийиллэр. Манна дойду президенин көҕүлээһининэн Россия уонна Германия научнай станцията тутуллубута», — диэтэ Борисов.
