Саха сирин сайыннарар корпорацията буолан ааспыт Илиҥҥи экономическай иккис форумҥа түөрт бөдөҥ бырайыагы федеральнай министиэристибэлэргэ билиһиннэрдэ.
«Инники кирбиигэ тутуллар инвестиционнай бырайыактар ахсааннарыгар Жатайдааҕы судноны тутар собуоту саҥардыы быарайыага биир сүрүн миэстэни ылар. Бу өрөспүүбүлүкэҕэ эрэ буолбакка, Россияҕа ураты суолталаах. Бырайыагы олоххо киллэрииттэн Арктиканы стратегическай сайыннарыы быһаччы тутулуктанар», — диэн СИА-ҕа корпорация генеральнай дириэктэрэ Геннадий Алексеев эттэ.
РФ-ҕа тыа хаһаайыстыбатын министиэристибэтигэр «Покровскайдааҕы» теплица хаһаайыстыбатын билиһиннэрдилэр.
«Форумҥа маннык икки бырайыагы киллэрдибит. Онтон биирэ Дьокуускай куорат бырайыага. Онно «Кангалассы» уруттаан сайдар сир-уот чэрчитинэн Япония технологиятынан оҕуруот аһын үүннэрэр, оҥорон таһаарар теплица хаһаайыстыбата, иккиһэ — «Покровскайдааҕы». Манна Голландия уопута туһаныллар», — диир Алексеев.
Ону таһынан Дьокуускайга IT-паарканы тутуутун дойду сибээскэ, Уһук Илини сайыннарыыга уонна экономическай сайдыы министиэристибэлэрэ өйөөтүлэр.
Көмүһү хостуурга Тарыннааҕы хонууну туһаҕа таһаарыы иккис түһүмэҕэ болҕомто киинигэр буолла. Маныаха быһаарыллыахтаах электросетевой хаһаайыстыба оҥорон таһаарар эбийиэктэри эрэ буолбакка, Өймөкөөн улууһун биэс нэһилиэнньэлээх пуунун уотунан хааччыйыаҕа.
«Бөһүөлэктэри «Халыма» федеральнай суолу кытта ситимниир суол тутуллар. Ити биллэн турар, өрөспүүбүлүкэ дьонун олохторун таһымыгар быһаччы дьайыаҕа», — диир корпорация салайааччыта.
