Сылын аайы ыытыллар тыа хаһаайыстыбатын бородууксуйатын астааччыларын Саха сиринээҕи VIII слеттара быйыл Бүлүү улууһугар тэрилиннэ.
Слекка кыттыбыт Амматтан “Амма”, Горнайтан “Маай”, Намтан “Эрэл”, Чурапчыттан “Чурапчы”, Үөһээ Бүлүүттэн “Чолбон”, олохтоохтор “Сыа Бүлүү” кооперативтара, өрөспүүбүлүкэтэээҕи батарар, хааччыйар “Сахаагропродукт” кооператив хамаандалара спорт алта көрүҥэр: волейболга, мас-рестлиҥҥэ, хапсаҕайга, эстафетанан сүүрүүгэ, остуол тенниһигэр, канат тардыһыытыгар илин-кэлин түһүстүлэр, технологтар күрэхтэһиилэригэр бастыҥ аһы ким астаабытын быһаарыстылар.
Слеты үөрүүлээх арыйыыга тыа хаһаайыстыбатын уонна ас-үөл политикатыгар министри солбуйааччы Семен Потапов, министерство аска-үөлгэ департаменын салайааччы Андрей Андреев , улуустааҕы тыа хаһаайыстыбатын департаменын салайааччы Иван Тарасов, “Сыа Бүлүү” улуустааҕы потребительскай кооператив салайааччыта Алексей Кондратьев мустубут дьону истиҥник-иһирэхтик эҕэрдэлээтилэр уонна бастыҥ үлэһиттэргэ Бочуот суруктарын, наҕараадалары туттартаатылар.
Бу күн “Тыа хаһааайыстыбатын туйгуна” үрдүк аат үлэ дьонугар Үөһээ Бүлүүттэн Иннокентий Боескоровка, Ньурбаттан Тамара Михайловаҕа туттарыллан үөрүү үксээтэ. Бүлүүлэртэн министерство Бочуоттаах суруктарын арыы сыаҕын үлэһитэ Дмитрий Константиновка, суоппар Алгыс Тимофеевка, ас-үөл департаменын Бочуоттаах суруга үүт сыаҕын маастара Максим Сыромятниковка туттарыллан үлэ дьонун өрөгөйдөрө үүннэ.
Рио-де-Жанейроҕа олимпиада саҕаланар кэмигэр Саха сирин олохтоохторун үрүҥ ас эгэлгэтинэн хааччыйар асчыттар Бүлүү к. “Хомустаах” культурнай-этнографическай киинигэр ардах-самыыр ортотунан, күннээх куйаас күҥҥэ буһа-хата тустан бурҕаҥнастылар, мас тардыһан мадьыктастылар, сүүрэн элэстэннилэр, мээчиги күөрэҥнэттилэр. Баар суох тустуукпут Виктор Лебедев өрөспүүбүлүкэ салалтата туруорсуутунан Олимпиадаҕа кыттар буолбут үөрүүлээх сураҕа үрүҥ аһы дэлэтээччилэри кыайыыларга өссө кынаттаабыт курдук буолан күрэхтэһиилэр кимиилээхтик, сытыытык аастылар, көрөөччүлэри астыннардылар.
Мас тардыһыытыгар бэтэрээннэргэ Амматтан Василий Артемьев бастаата, 70 кг диэри эр дьоҥҥо Чурапчыттан Айтал Седалищев, 70 кг үөһэ Горнайтан Иннокентий Луковцев тэҥнээхтэрин булбатылар.
Хапсаҕайга 70 кг диэри Горнайтан Иннокентий Терентьев бастаата, 70 кг үөһэ ыйааһыҥҥа Амматтан Василий Атласов, бэтэрээннэргэ Горнайтан Афанасий Иванов бастаатылар.
Дьахталлар эмиэ мас тардыһан, тустан элэҥнэттилэр. Волейболга аммалар иннилэрин биэрбэтилэр, иккис — намнар, үһүс — бүлүүлэр. Остуол тенниһигэр бүлүүлэртэн Арсен Павлов, Ньургуйаана Семенова кыайдылар, бэтэрээннэргэ Семен Катанов үһүс миэстэни ылла.
Күрэхтэһии кылаабынай судьуйата улуустааҕы спорткомитет бэрэссэдэтэлэ Гаврил Евсеев күрэхтэһии түмүктэрин иһитиннэрдэ.
Икки күннээх эрийсиилээх күрэхтэһии түмүгэр хапсаҕайга бастаабыт, эстафетаҕа, мас тардыһыытыгар, канаты тардыыга иккис миэстэлэммит Горнай хамаандата бастаата, иккискэ – олохтоохтор хамаандалара, үһүскэ – аммалар таҕыстылар.
Бүлүүлэр канат тардыһыытыгар уонна остуол тенниһигэр бастаатылар, аммалары кытта балларынан тэҥэнэспиттэрин хаачыстыба быһаарда.
Иккис күн тэрээһини үөрүүлээх түмүктээһиҥҥэ тыа хаһаайыстыбатын уонна ас-үөл политикатыгар министри солбуйааччы Семен Потапов, министерство аска-үөлгэ департаменын салайааччы Андрей Андреев салаа элбэх бастыҥ үлэһиттэригэр Бочуот суруктарын туттардылар. Депутаттар оройуоннааҕы Сэбиэттэрин Бочуот суруктарын оройуон Сэбиэтин бэрэссэдээтэлин солбуйааччы Владимир Афанасьев туттартаата.
Саха сиринээҕи тыа хаһаайыстыбатын хааччыйар, батарар потребтельскай кооператив “Сахаагропродукт” салайааччыта Константин Тимофеев көрүҥнэринэн бастаабыт, призердаабыт спортсменнарга мэтээллэри, кубоктары, бириистэри туттартаата.
Эт астары кыайа-хото тута оҥорон таһаарыыга “Бастыҥ технолог”, “Түһүлгэ” күрэхтэһиилэри дьүүллүүр сүбэ салайааччыта министерство үлэһитэ Алена Александрова кыайыылаахтары ааттаталаан бастыҥнарга бириистэри, Бочуот суруктарын туттартаата.
Күрэхтэһии кэмигэр кооперативтар, министерство салайааччылара кыттыылаах инники үлэни торумнааһыҥҥа “төгүрүк остуол” тэрилиннэ.
Бүлүүгэ ыытыллыбыт слет икки күннээх күрэхтэһиитэ, ыалдьыттары көрсүү, аһатыы бэрт тэрээһиннээхтик ыытылынна.
Үрүҥ аһы дэлэтээччилэр аныгы слеттара Ньурбаҕа ыытыллара быһаарылынна.
