Саха сирин делегацията Сочига Ыччат бэстибээлигэр кыттар

0
717

Сочи куоракка Аан дойдутааҕы ыччат уонна устудьуоннар 19-с бэстибээллэрэ үлэтин саҕалаата. Биһиги өрөспүүбүлүкэбититтэн Ыччат миниистирин бастакы солбуйааччы Василина Лукина салайааччылаах 150 киһилээх делегация кыттар. Кинилэри Адлер куорат аэропордугар волонтердар көрсөннөр Екатерининскай кыбартаалга баар гостиницаҕа олохтоотулар. Бэстибээл хас биирдии кыттааччытыгар анал таҥас уонна смартфон телефон түҥэттилэр.


Бэстибээл кыттааччылара уон күн иһигэр эрдэ талбыт хайысхаларынан араас маастар-кылаастарга, акцияларга, кэпсэтиилэргэ үлэлиэхтэрэ, бэйэлэрин этиилэрин киллэриэхтэрэ.

Маны таһынан, Саха сирин делегацията быыстапка тэрийэрин туһунан эрдэ суруйан турардаахпыт. Быыстапка үлэтин саҕалаата, үс былаһааккаҕа арахсан үлэлиир: Өлүөнэ очуостарын таһыгар 3D эффектээх сэлиини кытта хаартыскаҕа түһэр сир; саха худуоһунньуктарын графическай хартыыналарын быыстапката; өрөспүүбүлүкэҕэ ыччат сайдыытын кэрэһэлиир инфографика. Бу быыстапкаҕа сылдьыбыт омук дойдутун делегата Саха сирин туһунан өйдөбүл ылыахтаах.

Мас-рестлинг норуоттар икки ардыларынааҕы бэдэрээссийэтэ бэстибээлгэ анаан мас тардыһыыны сырдатар былаһаакканы тэрийдэ. Манна бу көрүҥү тас дойдуттан кэлбит бэстибээл кыттыылаахтарыгар билиһиннэрэр соруктаах араас тэрээһиннэр ыытыллыахтара. Төрүт спортивнай көрүҥмүтүн сырдата, маастар-кылаас ыыта уонна күрэхтэһиигэ кытта Арассыыйа уонна араас дойдулар күүстээх мадьынылара тиийдилэр.

Бэстибээл бастакы күнүгэр Саха сирин делегациятын кытта Ыччат миниистирэ Афанасий Владимиров көрүстэ. Мустубут ыччакка: «Эһигини олус интэриэһинэй күннэр күүтэллэр. Бэстибээл бырагыраамата олус киэҥ уонна интэриэһинэй. Эрдэ талбыт хайысхаларгыт үлэлэригэр көхтөөхтүк кыттыҥ, атын омук дойдуларыттан кэлбит делегаттары кытта билсиҥ. Манна сылдьан билбиккитин-көрбүккүтүн, билсибиккитин инники олоххутугар туһаныаххытын баҕарабын. Бэстибээлгэ кыттар Саха сирин хамаандата куруук баар буоллун, бэйэ-бэйэҕитин кытта ыкса бодоруһуҥ. Оччоҕуна ситиһиилээх үлэ тахсыаҕа», — диэн миниистир алгыһын тиэртэ.

Сочи Олимпийскай пааркатын «Большой» диэн муус дыбарыаһыгар Ыччат бэстибээлин үөрүүлээх арыллыыта буолла. Омук дойдуларыттан эрдэ биллэриллибит квотаттан таһыччы элбэх делегат кэлбитинэн сибээстээн, арыллыыга сылдьыахтаах олохтоох Арассыыйа ыччатын ахсаанын аччаттылар. Онно, Саха сириттэн 150 киһиттэн 25 делегат кытынна.

Саха сирин ыччата аан дойду таһымнаах бэстибээлгэ өрөспүүбүлүкэтин, Арассыыйаны киэҥник уонна дьоһуннук көрдөрөргө бэлэм.

0
0

Хоруй суох

Хоруйдаа