Бырабыыталыстыба бэрэссэдээтэлин солбуйааччылар отчуоттары түөлбэлэринэн ыытыы көдьүүстээҕин бэлиэтээтилэр.
Нэһилиэнньэни Уһук Илиҥҥэ сири босхо түҥэтиини сүрүннүүр сокуон, тыа хаһаайыстыбатын, доруобуйа харыстабылын сайыннарыы боппуруостара ордук долгуталлара биллибит.
Бюджет үбүн-харчытын туһаныы көдьүүһүн улаатыннарыыга анаан үлэлиир бырабыыталыстыба хамыыһыйатын үлэтин пленарнай мунньахха ырыттылар. Бырабыыталыстыба бэрэссэдээтэлин бастакы солбуйааччы Павел Маринычев ыйбытынан, бу сүрүннүүр уорган бастаан утаа ситэриилээх былааһы, Саха сирин баһылыгын уонна бырабыыталыстыбатын дьаһалтатын хааччыйыы орокуотун аччатар туһунан быһаарыыны ылыныахтаах.
Егор Борисов хамыыһыйа үлэтэ нэһилиэнньэҕэ аһаҕас буолуохтааҕын чиҥэтэн эттэ. Чуолаан государственнай бырагыраамалары олоххо киллэрии хаачыстыбатын тупсарыыга. Е.Борисов маныаха РФ Бырабыыталыстыбатын бэрэссэдээтэлэ Дмитрий Медведев кириисиһи утары үлэ былааныгар ыыппыт мунньаҕын түмүктэригэр ураты болҕомтону уурарга ыҥырда. Бу докумуоҥҥа экспорды, ол иһигэр үрдүк технологичнай уонна инновационнай бородууксуйалары өйөөһүн киирэ сылдьар. Олорор дьиэни тутуу, чэпчэки промышленность, тырааныспар, тыа хааһаайыстыбата уонна массыынаны оҥоруу инники күөҥҥэ тутуллубуттарын кини бэлиэтээтэ. Россияҕа бу күннэргэ киэҥник бэлиэтэммит Наука күнүгэр сыһыаннаан Егор Борисов Новосибирскай куоракка РАН вице-президенэ Александр Асеевы кытта көрсүһүүтүн сорох түмүктэрин билиһиннэрдэ. Өрөспүүбүлүкэ баһылыга Саха сирин тутаах научнай тэрилтэлэрэ кимтэн да тутулуга суох, бэйэлэрин бас билинэн үлэлиири ситиһэллэрэ наадатын ыйда.
Егор Борисов официальнай сайтыттан
