Саха сирин Ил Дархана Айсен Николаев Судаарыстыбаннай Мунньахха (Ил Түмэҥҥэ) Анал этиитигэр 2019 сылга “Сибиир күүһэ” магистральнай гаас утаҕын киллэрии инники өттүгэр өрөспүүбүлүкэ соҕуруу өттүн киэҥ хабааннаахтык гаастааһыны саҕалааһыҥҥа кыаҕы биэриэҕэ диэн бэлиэтээтэ.
Чуолаан, “Сила Сибири” көмөтүнэн гаастааһын Ленскэй, Өлүөхүмэ, Алдан уонна Нерюнгри оройуоннарын хабыаҕа.
Үүнэр сылга Саха сирин гаас салаатыгар уонна дойдуга бүттүүнүгэр даҕаны “Газпром” ПАУо ньиэптээх-гаастаах Чайыҥдатааҕы баайдаах сириттэн айылҕа гааһын биэриини саҕалааһын бэлиэ түгэнинэн буолуоҕа.
Өрөспүүбүлүкэ баһылыга өрөспүүбүлүкэ экэниэмикэтин сүрүн төрүтүнэн бырамыысыланнас буоларын бэлиэтээтэ. Быйыл таас чоҕу хостооһун 17 мөл туоннанан куоһарыаҕа. Бу “Мечел” хампаанньа Элгэтээҕи баайдаах сири баһылааһынын, “Соҕурууҥҥу Саха сирэ” ТОСЭР-гэ “Колмар” хампаанньа бырайыактарын ситиһиилээхтик сайыннарыыны кытта сибээстээх. “Хаҥалас” уонна “Соҕурууҥҥу Саха сирэ” ТОСЭР-дэр ситиһиилээхтик үлэлииллэр – 26 резидент оҥорон таһаарыыга 35,5 млрд солкуобай инвестиция укта, саҥа үлэ миэстэтин тэрийдилэр.
Наталия Чемашкина.
