Өрөспүүбүлүкэҕэ, Россия бары регионнарыгар курдук, баҕалаахтарга бүгүҥҥүттэн РФ Конституциятыгар көннөрүүлэри киллэриигэ куоластааһын саҕаланна. Сүрүн куоластааһын күнэ уларыйбат — от ыйын 1 күнэ.
Россия Конституциятыгар көннөрүүлэри киллэриигэ куоластааһыны тэрийээччилэр от ыйын 1 күнүгэр быыбардыыр учаастактарга дьон тоҕуоруһуутун таһаарбат туһаттан дьаһалы эрдэ ыыта турарга быһаары ылыммыттар, бу туһунан Саха сирин КБХ эттилэр.
Аҥардас Дьокуускайга бэс ыйын 25 күнүгэр 114 быыбардыыр учаастак үлэтин саҕалаата, өссө үс — Жатаайга. Учаастактар ханан баалларын бу сигэнэн саайтка киирэн көрүөххэ сөп http://www.yakut.izbirkom.ru/ эбэтэр маннык төлөпүөнүнэн ыйыталаһыахха сөп 40-88-85.
Саха сиринээҕи Киин быыбардыыр хамыыһыйа куоластааһын кыттааччыларыгар анаан төлөпүөн эбии нүөмэрин арыйда. Ыйытыыларгытын биэриэххитин сөп 8-924-879-2020.
Өрөспүүбүлүкэҕэ барыта 800-чэ быыбардыыр учаастак үлэлиэҕэ, Роспотребнадзор ирдэбилинэн харыстанар сириэстибэлэринэн хааччыллан олороллор: бэрчээккилэр, мааскалар, халааттар, санитайзердар, тепловизордар, биирдэ эрэ туттуллар уруучукалар уо.д.а. Хамыыһыйа чилиэннэрэ, кыттааччылар уонна кэтээн көрөөччүлэр туһаналлар.
Ыарыы дьаҥа кимиэхэ да сыстыбатын туһугар хайысхалаах үлэ күүскэ ыытыллар.
