НВК САХА — Өрөспүүбүлүкэҕэ сылга 4,5 тыһыынчаттан тахса киһи сүрэҕэ ыалдьан олохтон туоруур. Бу хомолтолоох сыыппараны аҕыйатар соруктан киин куоракка, ааспыт ыйга саҥа кардиологическай киини тутан саҕалаабыттара.
Саҥа киин Сэргэлээх суолугар тутулла турар. Баараҕай тутуу 16 тыһыынча кв. миэтэрэ иэннээх уонна аҕыс мэндиэмэннээх буолара былааннанар. Тутуу таас олоҕо барыта туран, быйылгы дьыл бүтүөр диэри дьиэ холлоҕоһо тутуллан бүтүөхтээх.
«Саҥа кардиологическай диспансер тутуута Уһук Илиҥҥи федеральнай уокурук сайдыытын бырагырааматынан ыытыллар. Уопсай үбүлээһинэ 4,5 миллиард солкуобайтан тахса суумаҕа тэҥнэһэр: 4,1 миллиард солкуобай федеральнай хааһынаттан, 460 мөлүйүөн солкуобай өрөспүүбүлүкэ үбүлээһинэ. Диспансер сүрүн нуормаҕа эппиэттиир ирдэбилинэн тутулла сылдьар. 8 этээс тухары араас сүрэх ыарыытын эмтиир отделениелар баар буолуохтара. 150 биирдии-иккилии миэстэлээх палаатаҕа диэн ананан бырайыактанна. Палата иһигэр суунар кабина уонна санузел туспа көрүллүөҕэ, аныгылыы олох ирдэбилинэн вай-фай уонна телевидение барыта баар буолуоҕа диэн эрэннэрэбит», —диэн Судаарыстыбаннай сакаасчыт сулууспатын куорат иһинээҕи эбийиэктэрин бырайыактыыр уонна тутар департамент салайааччыта Василий Филиппов кэпсээтэ.
