Саха сиригэр суола-ииһэ суох ыраах сытар нэһилиэнньэлээх пууннарга, ыстаадаларга, хотугу станцияларга, артыалларга, о.д.а. сирдэргэ олунньу 25 күнүттэн эрдэтээҥи быыбар саҕаланна. Быыбар хамыыһыйатын үлэһиттэрэ куоластааһыны ыыта бардылар.


Россия үрдүнэн барыта 35 региоҥҥа эрдэтэҥи куоластааһын ыытыллар. Уһук Илин регионнары таһынан хоту дойдуга үлэлии сылдьар дьон эрдэ быыбардыахтара. Сокуон быһыытынан, хас биирдии киһи ыраах ыстаадаҕа да, хоту акыйааҥҥа да, муораҕа да, ханна да сырыттын, быыбардыыр бырааптаах. Ол иһин Быыбар хамыыһыйатын үлэһиттэрэ бөртөлүөтүнэн, бураанынан, массыынанан, вездеходунан айаннаан биир-икки да киһилээх метеостанциялары, ыстаадалары, учаастактары, артыаллары барыларын кулун тутар 17 күнүгэр диэри кэрийиэхтээхтэр.

Саха сиригэр куоластааһын эмиэ саҕаланна. Олунньу 27 күнүнээҕи туругунан, Быыбар киин хамыыһыйата иһитиннэрбитинэн, Өймөкөөҥҥө уонна Кэбээйигэ куоластаатылар. Өймөкөөҥҥө 187 киһи быыбардаата. Бу маннык куоластааһын барыта 29 улууска ыытыллыахтаах. Сүрүннээн табаһыттар, сылгыһыттар, көмүс, гаас, ньиэп хостооһунугар сылдьар дьон, геологтар, метеостанция үлэһиттэрэ, булчуттар, балыксыттар хабыллаллар.

Оттон тас дойдуга сылдьар дьоҥҥо эрдэ куоластааһын кулун тутар 2 күнүттэн саҕаланыаҕа.

0
0
comments powered by HyperComments