Арассыыйатааҕы кикбоксинг чөмпүйэнээтин чэрчитинэн суруналыыс Владислав Коротов икки кинигэтин сүрэхтэниитэ буолла. «Кикбоксинг 30 лет прогресса» уонна «Альберт Иванов: Миссия – нести добро» кинигэлэргэ аатырбыт спортсменнар ахтыыларын нөҥүө өрөспүүбүлүкэҕэ кикбоксинг сайдыыта сырдатыллар.
«Кикбоксинг 30 лет прогресса» кинигэ икки өрүттээх. Аҥарыгар кикбоксинг Саха сиригэр эрэ буолбакка, Арассыыйаҕа, аан дойдуга сайдыытын туһунан кэпсэнэр. Биир өттө «Кикбоксинг Якутии. Хранители духа и традиций» диэн ааттаах. Манна саха спортсменнарын, тренердарын ахтыылара мунньуллубут.
Ньурба улууһун буоксаҕа хас да төгүллээх чөмпүйүөнэ, Чуумпу акыйааннааҕы флот чөмпүйүөнэ, өрөспүүбүлүкэтээҕи турнирдар призердара Альберт Иванов туһунан кинигэ спортсмен олоҕун, спортка ситиһиилэрин, тус олоҕун кэпсиир. Манна архыып докумуоннара, хаартыскалар, спортсмен тус суруктара, доҕотторун, чугас дьонун, бииргэ үлэлээбит дьонун ахтыылара киирбиттэр.
