Бэс ыйын бүтүүтэ 16 сыл тухары бүөрэ ыараханнык ыалдьан диализка сылдьыбыт дьахтарга өлбүт киһи бүөрүн олордубуттара. 12 күн ааспытын кэнниттэн дьахтар туруга үчүгэйин туһунан доруобуйа харыстабылын министиэристибэтигэр эттилэр.
«Кини туруга үчүгэй. Биохимическэй анаалиһа доруобай киһи киэнин курдук. Олордуллубут бүөр үчүгэйдик үлэлиир», — диэн хирург-трансплантолог Андрей Васильев этэр. Кини этэринэн, дьахтар аны диалиһынан туһаммат.
Быраас быһаарарынан, эмчиттэр өлбүт киһи уорганын олордууга былааннара улахан, ол эрээри ити үптэн-харчыттан тутулуктанар. Бүгүҥҥү туругунан бүөрү уонна быары эрэ олордууга харчы көрүллэр. Пациеннарга ананар эмп ыарахан сыаналааҕын кини ойуччу тутан бэлиэтиир.
«Олордуллубут уорган сөптөөхтүк үлэлиирин хааччыйар эмп биир ампулата 56 тыһ.солк. Онон, өлбүт киһи бүөрүн олордуу ыарыһахха быһа холуйан 1 мөл.солк. тэҥнэһэр.
Саха сиригэр бүөр олордуутугар 45 наадыйааччы баар. Оттон гемодиализка 300 кэриҥэ киһи сылдьар. Быары олордуу испииһэгэр билиҥҥитэ 20 киһи киирдэ. Маныаха бастакы эпирээссийэ 2017 сылга былааннанар», — диэтэ кини.
