Уһук Илиҥҥи федеральнай университет уонна Саха сирин бырабыыталыстыбата “Технопарк Русский” бырагырааманы олоххо киллэриигэ бииргэ үлэлээһиҥҥэ сөбүлэһии түһэристилэр.

Докумуоҥҥа Саха сирин бырабыыталыстыбатын бэрэссэдээтэлин э.т. Владимир Солодов уонна университет ректора Никита Анисимов илии баттаатылар.

Сөбүлэһии чэрчитинэн Саха сирин урбаанньыттарыгар тас дойду тэрилтэлэрин кытта эргиэн, оҥорон таһаарыы уонна научнай-технологическай бааза эйгэлэригэр сибээһи олохтуурга көмөлөһүөхтэрэ. Өрөспүүбүлүкэҕэ биисинэс-бырайыактары сайыннарыыга бырагыраамалары торумнуохтара.

“Саха сирэ уонна Приморье кыраайа наука уонна технология түргэнник сайдар сирдэринэн буолаллар. Манна Уһук Илиҥҥэ сүрүн федеральнай университеттар – ХИФУ уонна УИФУ бааллар. Аныгы үөрэхтээһин уонна наука бииргэ үлэлээһиҥҥэ олоҕураллар, онон Уһук Илиҥҥи федеральнай университеты кытта бииргэ үлэлиэхтээхпит”, — диэн Владимир Солодов бэлиэтээтэ.

Санаайа Иванова.

0
0
comments powered by HyperComments