Саҕынньаҕы атыылыыр Саха сирин предпринимателлэрин биир ассоциацияҕа түмүөхтэрэ. Итиннэ саҕынньаҕы атыылыыр салоннар 40 салайааччылара киириэхтэрэ. Уопсастыбаннай тэрилтэ үлэтин саҕалаабыт Иннокентий Лукин ити туһунан СИА-ҕа эттэ.
«Ассоциация атыылааччы да, атыылаһааччы да бырааптарын эргиччи көмүскүүр сыаллаах-соруктаах. Ону таһынан тэрилтэ элбэх ахсааннаах бэрэбиэркэлэр кэмнэригэр атыылааччылары быраап өттүнэн өйүүр. Оттон атыылаһааччылар хаачыстыбалаах түүлээҕи атыылаһалларыгар мэктиэ баар буолар», — диир Иннокентий Лукин.
Кини этэринэн, билигин «табаары туһанааччылар терроризмнара» үгэннээн турар кэмэ. Дьон саҕынньаҕы атыылаһаллар, ол кэнниттэн сотору буолан баран төннөрөллөр, харчыларын төттөрү көрдүүллэр. Маннык быһыы-майгы биир үксүн түүлээх сон хаачыстыбатыгар буолбакка, быһыыта-таһаата сөп түбэспэтэҕэр, сыаната сөбө суоҕар тирэҕирэр.
«Сокуон барыта атыылаһааччы туһатыгар үлэлиир. Онон туһанан сорохтор аһара бараллара баар суол. Ассоциация атыылааччылар интэриэстэрин көмүскүүр сыаллаах тэрилиннэ. Саҕынньаҕы атыылааччылар бука бары бырааптарын билэр буолбатахатар», — диир Лукин.
Маннык уопсастыбаннай тэрилтэни үлэлэтии саҕынньаҕы атыылыырга саҥа ирдэбиллэр киирбиттэриттэн тутулуктанар. Быйыл балаҕан ыйыттан ыла киирбит бэрээдэк быһыытынан, саҕынньах барыта булгуччу маркировкалаах буолуохтаах. Онно оҥорон таһаарааччылар, кууһунан уонна биирдиилээн атыылыыр дьон, комиссионердар, о.д.а. түүлээх ырыынагар кыттааччылар бары киирэллэр.
«Саха сирин ырыынагын баһыйар үксүн Кытай саҕынньахтара ылаллар. Греция, Италия киэннэрэ элбэҕэ суохтар. «Сэрбэкэ» атыы дьиэтэ Европа моделларын аҕалан атыылыыр, маркировка бастакы ирдэбиллэрин биһиги толорбуппут. Кытай саҕынньахтара хаачыстыба өттүнэн мөлтөхтөр. Кинилэр ортолоругар үчүгэйдэр көстөллөр», — диир кини.
Маркировка, атыннык эттэххэ «чипирование» саҕынньах сыанатыгар 20 солк. эбэр.
«Бүгүҥҥү туругунан кэтэх атыыһыттар бигэргэммэтэх хаачыстыбалаах, хайа да нолуогу төлөөбөт үгүс дьону кытта күрэстэргэ күһэллэллэр», — диэн РБК таһаарыыга «Снежная королева» президенэ Вугар Исаев этэр.
СИА саҕынньахтар хаачыстыбаларын бэрэбиэркэлээһин түмүгэ тугу көрдөрбүтүн туһунан Роспотребнадзор Саха сиринээҕи управлениетын ыйытыгар хоруйу тохтуу түһэн баран биэриэхтэрэ.
Маркировка быраабылатын кэспиттэргэ 300 тыһ.солк. диэри суумалаах ыстараап олохтонор. Табаары былдьыыллар уонна суох оҥороллор (КоАП РФ, 15.12 ыстатыйата).
1 мөл.солк. тахса сууманы куоһарар элбэх саҕынньах баартыйата маркировкаламматах буоллаҕына, холуобунай дьыала (ХК 171-с ыст.) тэриллиэн сөп. Бу ыстатыйа быһыытынан, ыстараап кээмэйэ 1 мөл.солк. диэри тиийиэн, көҥүл 6 сылга диэри хаарчахтаныан сөп.
